蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年04月29日

【短片】【方展博撬孝蟹牆腳?】益蟹陶大宇大笑:呢啲唔使理佢,佢傻0架!

攝影:葉君海(右圖)
建立時間 (HKT): 0429 06:00

講起神劇《大時代》,韋家輝X曾謹昌呢個組合,其實,仲有另一套經典劇都好值得大家回味,呢套就係鄧特希嘅《壹號皇庭》系列。喺《大時代》飾演益蟹嘅陶大宇,喺《壹號皇庭》系列飾演師爺江承宇(Michael),妹妹係劉美娟(江承宙),媽媽係大狀江李頌雲(蘇杏璇)。至於Michael身邊班老死,包括阿Ben歐陽震華、阿公蘇永康、彬Sir駱應鈞,仲有後來加入但死於非命嘅Eric蔣志光。

美好的90年代,劇集都特別好睇。呢個《皇庭》組合,雖然暫冇機會合作拍劇,不過合作做節目都還可以嘅。今日大宇就請來《皇庭》班老友去灣仔一間showroom,錄影佢主持嘅有線節目《我愛煮食男》。班底有劉美娟、蘇永康、駱應鈞同監製鄧特希。大宇即席下煮,又送上由佢自己親手調配嘅醬料。大宇話自己都係一邊拍一邊學煮,仲一邊偷食添:「通常第一次整都唔會100分,都係7、80分左右啦。」至於開食肆就話唔諗住,反而考慮出書。

講到話《大時代》第六集、丁蟹打死方進新一場,深夜時段收視再升,大宇就話:「其實《大時代》都唔係第一次重播,除咗故事好,電視台又配合大勢,最重要係互聯網嘅關係,依家係百分百成熟,有黃蜂效應。我覺得互聯網幫助最大,以前冇網友冇人講0架嘛。」可有因此劇重播多咗job?大宇話分別不大。

至於會否請幾隻蟹仔做節目嘉賓?大宇就話:「啟明講到明唔出嚟,可能佢依家做嘅嘢唔適合以娛樂圈人身份出現。秋官有合約在身,亦唔方便做嘉賓。」

講到話孝蟹邵仲衡暗示青雲撬牆腳追劉美娟,大宇聞言笑道:「下?講埋咁嘅嘢?呢啲唔使理佢,佢傻0架,依家仲係咁傻。佢一向講嘢都咁奔放豪放,關佢哋乜嘢事呢?幾十年前,算啦!唔好理!」

好喇,咁拍《大時代》嗰陣,男女感情係咪好亂先?大宇話:「冇喎,我哋四隻蟹仔嗰個時似白紙,戲份唔多,壓力都唔大,返去都係玩咁,唔理咁多嘢,而且嗰陣我哋仲係0靚仔。」咁青雲係咪真係追劉美娟?點知大宇聽錯咗話係追郭藹明,就話:「嗰陣時唔知0架,拍完先至追0架嘛,嗰陣都唔覺。」

大宇又笑言:「青雲當時點會追女仔?佢角色咁重,如果唔係點會有今日成就?佢當時唔玩0架。」又重申唔知道青雲有追過劉美娟:「完全唔知,我唔知人物關係,咁耐嘅嘢,唔記得喇,只記得好好玩,蒲完通宵又一日喇。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載