› 選擇地區
三藩市
紐約
洛杉磯
其他美國地區
香港 台灣 北美
 
2015年05月18日

【短片】【Eason問診大會】防觀眾於個唱亂叫?Eason難控制:唔通叫《陳奕迅叫你唔准叫演唱會》?

(攝影:陳志嵐)
建立時間 (HKT): 0518 06:00

有歌神及吹神之稱嘅陳奕迅(Eason),今日化身「醫神」,親臨《蘋果日報》facebook專頁,歡迎網民及粉絲「問診」,Eason會喺個post度親自回覆大家留言。

摘錄部份Eason精彩回應:

關於快樂...
林一峰問Eason:Areyouhappy?
醫神:呢句雖然好似好簡單,但happy呢樣嘢…或者咁講,若果我答完呢條問題就釘蓋,我人生都係happy。我當然係happy,但心裡面都唔會永遠滿足。例如我唱隻無條件,又會有啲唏噓感覺。做呢一行,永遠唔飽。

關於戒煙...
問:可唔可以快d(啲)戒煙?
醫神:成日掛係口邊嘅嘢,反而唔會做。

關於Talkshow...
問:Eason,幾時開talkshow?
醫神:唔好啦掛?我開talkshow?有同林海峰傾過,我唱歌林(海峰)負責講。但佢要對我好有信心。

關於聽歌...
問:你成日唱歌,咁自己聽開咩歌多?如果完全唔駛理市場,最想試下唱咩類型既歌??
醫神:我上年開始聽多。咗好多內地樂隊,逃跑計劃啦,本地嘅雞蛋煎(蒸)肉餅啦,小塵埃,mylittleairport都一直聽開。英國嘅Blur等等,我亦鍾意聽jazz。

關於唱歌媾女...
問:Eason哥,究竟唱你邊首歌先可以溝到女?
醫神:有一隻我無plug過嘅歌:99年幸福嗰隻碟,《快高長大》。你以為隻歌係寫俾仔女,但其實係寫俾情人。你要喺對方耳邊唱。

關於搭車...
問:醫神,塞車時候你會唔會轉搭其他交通工具
醫神:我不嬲都搭交通工具架喎,塞緊的士咪搭地鐵囉~而我最少搭嘅交通工具係van仔,電車就好正~

關於亂叫...
問:阿臣,有無諗過有咩方法可以叫人唔好再係你既concert入面亂叫?
醫神:唔使咁緊張或認真,搞到自己咁神經衰弱,我控制唔到人哋叫,唔通賣飛時叫《陳奕迅叫你唔准叫演唱會》咩!XD

關於食飯...
問:你去開邊頭食飯?lol想搵下你吹水~
醫神:我平時唔講嘢架喎。

關於開公司...
問:聞說你開左製作公司請唔請人呢XDD
醫神:請你做咩先ThetheWa~(網民名字)

關於好耐冇上TVB...
問:你就快要上萬眾同心公益金,心情係咪好興奮?可唔可以形容下?
醫神:都幾架其實!好耐冇去過電視城。感覺新鮮。驚撻Q添。

關於上台表演...
問:表演太緊張時,你會有咩方法令自己無咁緊張?
醫神:定啲嚟先,定定神,唔好怕deadair。

關於出黑膠碟...
問:Eason會考慮發行精選黑膠唱片,CD..etc...thx^^
醫神:會~希望唔同聽眾都得到鍾意嘅嘢。

關於跑步...
問:Eason~有沒有跟阿徐(徐濠縈)跑馬拉松~
醫神:我係唔跑步嘅,尋日佢先跑完43km,環島,真係好勁。就算踩單車我都要諗諗。

關於林子琦同買飛...
問:Hi醫神,你好呀!1/你覺得林子琦(台灣舉重女選手)同你似樣嗎?(附圖)2/只選一個,你會花錢買以下邊個的演唱會飛(assume佢地冇俾飛你)A)李克勤B)GEMC)韓红D)陳奕迅.
醫神:1/似!佢勁好多,我放唔到條嘢喺頸度。佢個表情都唔易做。
2/佢哋嘅飛,我個個都唔駛買架喎,直接搵佢就得。但調返轉,如果李克勤買我嘅飛,我就覺得好榮幸嘞。

關於出英文專輯...
問:Eason,有冇諗過出全英文專輯?
醫神:其實有。我再問下唱片公司。

關於華星...
問:Eason~幾時先開華星三寶演唱會或者合作拍電影~~?
醫神:真係問得好!諗緊。想睇埋《華麗上班族》成績先再算。

《蘋果日報》facebook專頁:
http://facebook.com/hk.nextmedia

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載