› 選擇地區
三藩市
紐約
洛杉磯
其他美國地區
香港 台灣 北美
 
2015年06月06日

【維穩騷圖文不符】白宮發言人貼圖:觀眾不少,特首和年輕人同樂

設計圖片
建立時間 (HKT): 0606 06:00

即係咁,呢個口號係「擁抱音樂、燃點夢想」,「旨在為香港青年帶來一場音樂盛宴」嘅「2015香港青年音樂節」,係同大家紀念香港「回歸」18周年、促進香港與內地青年文化交流而搞嘅。呢個騷,犀利囉,免費派飛,號稱一早派晒,但開騷之後,都係得五成入座率,最高峰得7成。

個騷嘅主辦單位,係新華社亞太日報同香港華菁會,其他協辦單位包括民政事務局同「中央政府駐港聯絡辦青年工作部」、「特區政府青年事務委員會」等等。個騷最大賣點係韓星金鐘國同T-ARA。去年梁振英赴韓拜會韓國總統朴槿惠後,喺網誌中有感而發話:「香港年輕人對韓國的演藝人十分欣賞,我希望日後在重要的節假日,能安排來香港表演,促進兩地演藝文化交流。」

特首同高官們真係以為韓星可以麻醉年輕人的靈魂,故即使新沙士來勢洶洶,仍照計劃安排韓星來港演出。有韓星又點喎?都係坐唔滿。梁振英今晚上台頒發紀念狀時,台上有掌聲,台下零掌聲。網民紛紛留言啦,有人話:「大家唔好咁啦,俾啲噓聲佢啦!」

出名喺返工時間同記者喺fb筆戰嘅「白宮發言人」(正職係新聞統籌專員)馮煒光,發功喇。佢今晚除咗拍咗兩條片,見證梁振英如何「投入興奮」之外,仲喺台下幫特首影咗張靚相;相中梁振英疑似想起身或想坐低,身邊一眾VIP「靜觀其變」唔郁,去到後幾行企位先見有fans舉機唔算太興奮咁影相。馮煒光條caption係:「特首出席2015香港青年音樂節,和年輕人一起欣賞韓國女子組合T-ARA及鍾㦤的演出。」

馮煒光星期六唔使返工,但佢依然好盡責咁幫主子又拍片又影相——都唔止,仲將頭先嗰張梁特首唔知坐低定起身嘅相,貼咗上《蘋果》fb,連caption都改埋,變成「觀眾不少,特首和年輕人同樂」。但相中年輕人同觀眾,唔似「樂」喎……

網民見白宮發言人難得去《蘋果》fb留言,即回應謂:「馮生,開工啦…」、「你拎住部iPhone6緊係影全景啦,唔係唔識用下嘛?」

綜觀現場所見,梁振英一直坐喺VIP位,唔見得如何同年輕人「同樂」,但都有聽埋幾首歌先走。走嗰陣仲有十幾個保鑣貼身護駕……既然話係同樂,梁特首何必「自絕於年輕人」自我隔離呢?圖文不符喎白宮發言人……

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載