蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年06月23日

【惡毒老人同盟】又「先知」探討安老問題寸爆「蛇齋餅糭」

(電視圖片)
建立時間 (HKT): 0623 06:00

俾「一男子」玩謝嘅王維基,已「拒絕再玩」,HKTV錄得巨大虧損,港視劇亦正式倒數,播到9月就冇晒貨唔會再拍,雖然一開台好多網民力撐維基,可惜現實就係HKTV一直以嚟嘅平均點擊率同廣告收入都不如理想。

但港視劇始終題材都係較新穎,好似o依家播出嘅《惡毒老人同盟》,破天荒起用資深甘草演員做主角,以老人角度拍出一套黑色幽默喜劇,說是喜,實在為悲,先唔講呢套劇開拍遇上幾多波折,劇中帶出的老人問題,是香港將來十年,二十年要切實面對的安老問題。加上最近發生劍橋護老院事件,港視劇再一次發揮「先知劇」嘅功能,同大家探討安老問題。

姜大偉飾演的「毛守仁」,為求避免家人送佢去中山安老院,扮病,扮整唔見回鄉卡乜都做齊,只係唔想去中山,因為對好多老人家嚟講,要入安老院等同於等死。郭峰飾演的威哥,家有新來港少妻(劉依靜飾),為不舉問題煩惱挺而服食偉哥重振雄風,亦反映到中港婚姻及老人性慾等問題。白彪飾演的星哥,是為退休龍虎武師,極怕老婆,閒餘去做替身,老婆大鬧片場兼奚落一番。

姜大偉為悍衛老人嘅尊嚴,決定成立「惡毒老人同盟」(但劇情未講到佢哋會做咩),仲會寸下一班專派「蛇齋餅糭」嘅建制派,但當然唔係套劇嘅重點,根據編審鮑偉聰差不多2年前嘅一篇文章,佢話:「從創作角度,我早已經恨透那種一家人齊齊整整吃飯聊天式廉價溫馨,還有那些不吃人間煙火式所謂小品喜劇。現實裡老人家面對多少艱難,人心不古,電視從來不見,老人以毒攻毒,以眼還眼,都只不過是對社會不公不義的控訴。於是在自由創作環境下,沒有人跟我維穩玩和諧。」

香港老人問題當然唔係TVB式那種「煮個麵你食」,「最緊要一家人齊齊整整」等等可以呈現出嚟,當地鐵內冇人讓座俾老人,可以俾人放上網批鬥到體無完膚,但同時亦有家屬對老人院對至親施虐視而不見,最緊要有位安置,「一家人齊齊整整」,其實真係唔係睇劇咁容易。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載