蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年07月05日

【短片】全職變散工now主播隨時冇得撈

(攝影:沈健程)
建立時間 (HKT): 0705 06:00

電盈的香港電視娛樂(nowTV)獲批出12年免費電視牌照,一眾nowTV藝人原本滿心歡喜準備迎接開台日,早前齊齊整整以夏日summerlook舉行下水禮,拎水槍互射玩得盡興。

不過,自從何麗全離職後,盛傳新高層上場要大肆改革,投放更多資源落免費台,有意將now收費嘅102觀星台於9月底關閉,梁思浩同梁榮忠嘅王牌節目可能無聲無息被cut走。

藝員部更成重災區,據悉十幾位合約藝人約滿後將陸續無得留低,過往佢哋嘅主要工作是幫收費台做主播、旅遊、資訊等節目,雖然人工低好抵用,但高層再計算成本下想慳得就慳,寧願全部轉散工,無需每月支薪,又可以請無綫、港視和亞視的離巢藝人,增加新鮮感。

身在外地拍旅遊特輯嘅黃心美直言有所聞,佢話﹕「都擔心,話摺話摺都未摺埋,要返嚟了解吓先。」佢又表示自己係最穩陣一個,佢解釋:「我係全公司唯一一個員工藝人,合約至明年9月先完,有bonus、醫療,同其他人唔一樣。」據悉90後嘅林志超(Andy)上月底約滿後已不獲續約,今日佢喺電話表示﹕「係冇簽經理人合約,自己manage自己,冇固定底薪,但自由度大啲囉,未簽之前我都係part-time。」

另外,鄧洢玲(阿旦)同夏雨兒子黃奕晨噚日同一班nowTV藝人喺迪士尼參與《觀星總部》1000集錄影,阿旦自言有為將來打算,佢話:「我仲有一年約,唔太擔心,因為自己外面都有做啲網購生意。」黃奕晨就話:「我年底約滿,但仲有一年生約,公司未同我哋講任何嘢,聽講8月會開大會,好似會有啲嘢搞,唔擔心咁多。」下月中約滿嘅蔡誌恩就表示:「好似有聽過,之後會用其他形式合約,自己有信仰相信有安排。」而佢日前於fb灰爆留言﹕「如果有一天我失業,改行去賣魚蛋,有人會請我這『老嫩肉』嗎?」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載