蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年07月15日

【短片】【良心記者】無綫記者陳亮均lastday:戰友逐一離開

(陳亮均fb圖片)
建立時間 (HKT): 0715 06:00

大台新聞主播,好多市民都存有幻想,如果唔係「小花爭寵」,出書爆料就唔會咁引人入勝,而愈來愈「河蟹」嘅大台新聞部,亦令人思考主播究竟係讀稿機器,定私底下仍然有個人意志,面對公司嘅壓迫,面對「斬頭斬尾」嘅VO,係咪照讀如儀都過到自己良心嗰關?

繼「暗角七警」事件後,處理呢單新聞嘅編輯主任周潔儀、前助理採訪主任何永康,另外4名記者主播談美琪、劉芷欣、林昭儀、趙珮瑜喺今年3月已經辭職,到上個月無綫主播彭國柱亦辭職。今日,就輪到主責報道文化及教育新聞嘅記者陳亮均lastday。

無綫新聞部咁多人請辭,令人不期然去想原因為何。其實喺陳亮均fb,係有跡可尋....佢中學就讀陳瑞祺喇沙書院,上年9月,轉載母校瑞祺政改關注組有關罷課嘅相片寫住:「Boysinred!!!!」

然後,「928」前夕,放咗一張政總好多人集會嘅相,寫住:「TonightweareyoungSoletsettheworldonfireWecanburnbrighterthanthesun」

去到上年11月,佢到母校採訪,影咗一張門外放滿黃傘嘅相,今年6月,佢頂住大雨採訪政改新聞,並寫道:「因為要做多面睇,今次政改完全唔使搞。無無聊聊間發現原來10年政改我有份做,仲做足三日,滂沱大雨下做直播,唔睇返相其實我都唔記得喇。」個tag係「‪#‎我要真普選」。

好喇,去到今日,陳亮均fb就放咗自己整嘅「散水糖」,啲糖仲有無綫logo,佢寫道:「七年以來,每天睡醒上班都在實踐自己的夢想,其實是很幸福的事。曾在兩間電視台當過記者,立法會選舉、特首選舉、79天的佔領、四川雅安地震、茂名反PX示威,「(梁振英)你係咪當選就唔答記者問題」........經歷未必比別人多,但大大小小新聞事件,確實是畢生難忘。」

陳亮均續寫道:「過去大半年,身邊戰友逐一離開,踏上不同的路,感嘆之餘也成就了思考前路的契機。於是在七年過後的今天,帶著點點不捨地換上新跑道,出去看看外面的世界。記者之路暫止於此,感激這路上的所有朋友、同事、行家、受訪者和幫助過我的人,有你有我。」

後會有期。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載