蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年08月10日

【短片】【亞視大改革】取消八個台名 改為一至八台財經新聞全講普通話

聽聞亞視財經同新聞頻道台主要都係講普通話。(設計圖片)
建立時間 (HKT): 0810 06:00

亞視早前就指有新嘅投資者,而盛傳就係山東財團,新老闆上場,亞視就梗係要做番啲嘢,早前亞視執行董事葉家寶,喺公開活動透露,嚟緊亞視會重組,至於點搞法就要遲啲公布。

不過,本報記者收到消息,亞視除咗開24小時財經台之外,仲諗住取消晒所有台名,亦即係唔再叫本港台、國際台、歲月留聲、亞洲台、深圳衛視、CCTV1、美洲版(東岸)同美洲版(西岸)呢八個台名,改為叫一台、二台、三台、四台、五台、六台、七台同八台,而且佢哋好多個台係以講普通話為主0添。

聽聞一台其實就係做番本港台嘅節目,二台暫定係24小時財經同新聞台,三台係做番國際台嘅嘢,四台就係普通話嘅娛樂頻道,五台係類似以前歲月留聲台播舊劇嘅重溫台咁,但0依家就加埋播電影,另外美洲版東、西岸台就會合而為一,CCTV1同深圳衛視亦會保留並改名,屆時觀眾要揀台睇,就要記得一、二、三、四、五、六、七、八係乜東東台至得啦!

不過,聽聞亞視財經同新聞頻道台主要都係講普通話,又整多個講普通話嘅娛樂台,好明顯唔係畀土生土長嘅香港人睇,target係國內同胞啦!唔單止咁,亞視諗住每個台設一位台長,好似電台咁做,相信對觀眾同亞視員工嚟講,與其搞咁多花臣,不如準時出糧俾員工仲好啦!

當然,亞視經常變嚟變去,開記者會都可以又開又唔開,唔到最後一分鐘,真係唔知佢哋變成點囉。而記者都打過畀亞視求證,亞視方面回應話:「亞視正積極籌備以全新面貌與觀眾見面,包括開設24小時財經新聞頻道等,請觀眾密切留意。」

亞視高層葉家寶今晚回應本報:「改名一至八台重係研究當中,適當時候會公布,至於24小時財經台,初期係會有廣東話,普通話同英文嘅,而家內部試運作緊。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載