蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年08月21日

【唔會對抗中國】邱達昌搞新台 忠臣蔡國威劉錫賢…續約亞視一年

邱達昌(右圖右二)噚日宣佈搞新台,劉錫賢(左圖)考慮去,又爆噚日同蔡國威續約亞視一年。(小圖)(攝影:仇志德)
建立時間 (HKT): 0821 06:00

已故亞洲電視前主席邱德根之子邱達昌牽頭成立的永升(亞洲),噚日宣佈申請免費電視牌,並打算改台名做「新亞」,邱達昌係大股東,第二大股東係聯想控股旗下嘅「弘毅投資」,邱達昌噚日話明,致力將「新亞台」打造為「香港人嘅電視台」,但長遠計係希望同時喺廣州「落地」,仲強調「新亞台」立場中立,「唔會對抗中國,會做應該做嘅事。」

做應該做嘅事包括取消原先計劃開嘅24小時新聞台,理由係依家能夠爭取嘅數碼頻譜只能開3個頻道,故以體育台取代。

「新亞」亦講明,優先取錄亞視員工,似是擺明車馬要取代亞視位置。今日亞視一班忠臣子,包括劉錫賢、蔡國威、張家榮、徐丁,聯同執行董事葉家寶,再度聚集亞視大埔總台,出席「全新財經資訊節目」記者會,介紹一系列新節目,包括《女人資本論》、《君擎財經》、《今日亞洲》同《投資先機》,至於之前要增聘人手開嘅24小時財經頻道,就暫未有公佈。

自爆最近好黑仔嘅劉錫賢,繼日前食飯心跳停頓被送入院後,噚日又撞傷頭。問可有興趣加入永升?佢話:「我都希望有多個電視台,但0依家都係服務番亞視先,噚日同威仔(蔡國威)同亞視續咗一年約,但如果日後佢哋(永升)搵我,我都會考慮,因為呢度好自由,無綫叫我都可以去。」竟然……續約?

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載