蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年08月26日

【網絡男神選舉】着泳褲騷肌 得獎者鄧嘉傑恨同周家怡合作

(攝影:陳順禎)
建立時間 (HKT): 0826 06:00

雨僑﹑田啟文﹑張建聲及石詠莉等,噚晚喺荔園出席《猛龍特囧》香港網絡男神選舉,並擔任評判,而網絡紅人劉馬車擔任表演嘉賓,除咗唱飲歌《雙子情歌》外,又拎手機自拍,兼且不停hardsell自己,相當搏命。不過田啟文就彈劉馬車唱歌流流哋,但幾有喜劇天份。

至於一眾候選網絡男神要過五關斬六將,除咗自我介紹及答問環節外,又穿泳褲騷肌,佢哋要着平腳泳褲現身,三號曾永康身材最瘦蜢蜢,四號黃浩霆被評判要求佢扮淫婦,而浩霆亦七情上面投入角色,甚至以雙手掩下體重要部位;

另外,五號陳卓華擁有巨大雞扒胸;至於九號鄧嘉傑出場時,評判叫佢揀AV女主角,佢竟口快快話揀沖田杏梨,評判質疑佢咁快講答案,係咪平時睇開AV?鄧嘉傑就尷尬表示:「唔係呀,喺香港睇到一套電影有佢份。」評判就問佢:「邊套邊套?」

最後鄧嘉傑勝出網絡男神選舉得獎,佢話:「冇諗過自己得獎,個個都旗鼓相當,各有魅力,但自己都有信心。(贏喺邊?)笑容﹑真誠及熱誠。(希望入行?)係呀,本身嚟呢度就係明確思想,就係想入娛樂圈及拍戲,期待嚟緊同周家怡合作。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載