蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年09月11日

【超盈獨家專訪5】做過法官助理幫人沖咖啡同影印

超盈開始幫家族打理酒店生意。 (攝影:葉君海)
建立時間 (HKT): 0911 06:00

賭王何鴻燊同四太梁安琪所生嘅大女何超盈今個月底就滿25歲,原來佢舊年已經按步就班協助媽咪打理酒店拓展業務,與保利(PolyAuction)喺澳門成立拍賣行等工作項目。

超盈日前喺澳門氹仔區麗景灣酒店接受本報獨家專訪,講事業當時處於起步階段,原來佢未幫手打理家族生意前,曾做過銀行、律師樓暑期工,印象最深刻係17歲做過法官助理,超盈稱:「喺高等法院幫人沖咖啡、影印,又要去法庭聽案件。」

超盈選擇咗酒店項目為起步點,主要係想融入自己嘅興趣,佢話:「我覺得澳門唔係剩係賭場,自己鍾意做藝術,畫油畫,媽咪覺得我唔應該剩係想做畫家,又鍾意去世界各地睇騷。媽咪覺得既然我鍾意藝術畫嘢,建議我將藝術元素擺喺酒店生意,會發揮更好。」

超盈畢業於香港大學藝術系,因為要開始接手搞酒店管理,就去咗瑞士進修MBA嘅Internationalbusiness課程,令自己較易上手。超盈稱:「我好幸運,喺自己公司做嘢,可以一對一請教,好似問則師劃CAD圖、視察地盤、開會,要由基層到管理層做上去,都係一路做一路學,要知同事做緊咩,又唔可以乜都要問人,時間漫漫長,所以要進修。」

之前超盈曾促成澳門Versace酒店同Chanel創意總監KarlLagerfeld合作,仲分享咗少少同老佛爺KarlLagerfeld傾生意嘅趣事,超盈話:「媽咪用開好舊嘅Nokia電話,KarlLagerfeld見到問點解唔用iPhone,仲送咗一部畀媽咪,不過佢唔捨得用,同埋Karl影相一定要戴黑超,但佢簽文件嗰時又要戴readingglasses,佢係一個好嚴謹、堅持自己風格嘅人。」

超盈翻新呢間葡式舊建築物風格嘅度假酒店,原來係有特別嘅意思,皆因賭王以前成日帶佢哋去歡度周末,享受familyday,呢啲係佢嘅集體回憶,同埋自己又做緊藝術拍賣元素,超盈表示,出年會喺呢度搞第一次酒店藝術博覽會(HotelArtFair),每一間酒店房亦會擺啲新晉藝術家嘅作品。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載