蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年09月11日

【超盈獨家專訪2】賭王教你做生意:用人要叻,要搵忠心嘅人

超盈視父母為人生偶像。
建立時間 (HKT): 0911 06:00

在四房大女何超盈眼中,賭王何鴻燊同媽咪梁安琪係superman同superwoman,做生意好叻,仲係自己營商管理嘅「百科」。超盈話:「爹哋做老闆冇架子,平易近人。佢成日教我唔好忘本,佢對員工好好,好多員工都唔捨得走,好多上咗年紀員工都睇住我大。佢叫用人要叻,要搵忠心嘅人,一個忠心嘅伙計會慢慢幫到你,有一個叻嘅團隊,做生意好緊要,一間公司唔係剩係靠老闆。」

超盈又指,賭王雖然好忙,同時亦分配好多時間陪仔女,超盈話:「爹哋擺好多時間喺我哋身上,好似我細個表演跳舞,佢次次都坐第一行,家長日一定去。每次好多人望住佢,會搵佢簽名,好多人仰慕佢,試過有老師問我:家長日可唔可以叫爹哋嚟,可以講得我好啲。」

四太呢?超盈形容媽咪係一個坐唔定嘅「女超人」,佢話:「佢要不斷做嘢,唔可以得閒冇嘢做。佢係一個好嚴嘅老闆,試過開會,我遲咗半個鐘,佢當住所有人面前,話唔使我開,叫我出番去,嗰刻覺得尷尬冇面,不過媽咪用心良苦,教我要專業,做生意要一視同仁,做嘢唔啱即鬧,唔會婉轉、好直接,不過做啱都會讚,賞罰分明。」

超盈眼中媽咪呢位「直屬老闆」,勤力、有魄力,平時一諗到idea就即做,主張閒餘時間要不斷學嘢:「佢好business-minded,去時裝騷係留意人哋setup,唔係剩係睇衫。」

咁超盈準備好做媽咪嘅接班人未?佢謙稱:「佢太叻,覺得我未必可以一個人接晒。自問冇媽咪咁勤力,同佢辦事能力好高,我覺得要加埋細佬妹先可以接佢班。」

喺office一個樣,咁喺屋企呢?賭王在家中,原來係一個「YesDaddy」,超盈笑言:「佢好縱我哋,唔鬧,不過佢皺一皺眉頭,我哋就驚,收到喇!」至於四太...超盈就形容:「媽咪從來冇打過我哋,最慘嘅懲罰係佢會不斷講,不斷訓話,同埋佢一叫我哋全名,就係一個signal。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載