蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年09月15日

【短片】【新老闆傳涉刑拘】繼續話前景樂觀 亞視「高管」葉家寶:我都未出糧

(攝影:陳俊強)
建立時間 (HKT): 0915 06:00

亞視執行董事葉家寶今日同旗下藝員蔡國威、袁潔儀、楊正軍同馮家俊去到土瓜灣一間酒店出席「敬老迎中秋」活動,離開亞視三年嘅黎燕珊都有嚟支持。

講到亞視經理人德勤前日發聲明澄清,指上星期記者會講到嘅「完成股權轉讓」,係指喺股權轉讓合同下,買家已完成支付責任,股權轉讓仍要待通訊局批准(新聞連結: http://goo.gl/swK69R ),葉家寶就話:「我哋好清楚股權變動要得到通訊局審核,我諗德勤已經作出解釋,已清楚知道係要通訊局最後審批。」問擔唔擔心之後有乜意外?家寶話:「相信通訊局會按程序去辦,我知我哋申請符合通訊局股權變化要求。」

講到個新股東傳喺內地涉及刑拘,家寶就話:「同新股東接觸過,適當時候佢會澄清。」擔唔擔心資金問題?佢話:「今日又再發放咗大部份員工8月薪金,依家仲有20幾位高管(「高管」?原來係管理高層)包括我未發放,聽日會解決埋。我相信新股東所有手續搞掂,資金就會到位。」

咁班員工其實擔唔擔心?家寶話:「每間公司有變動,相信一定有唔同聲音,好多消息喺市場散播,清者自清。」家寶話亞視未來會大搞,問佢依家係咪請人?佢話:「解決薪金問題,先再恢復請人,工程部同節目都缺人。」家寶話對亞視前景樂觀,但問到佢傳聞被架空同要將佢調離亞視,家寶就話:「好多傳聞,我依家仲係執行董事。」

今日活動就由蔡國威做司儀,佢好心話自己已經出咗糧,有錢使。講到亞視新老闆背景神秘,又傳涉及刑拘,威仔話:「聽講過,人誰冇過,冇乜大問題,應該畀機會人哋改過。」

而黎燕珊今日見到家寶好開心,話家寶代表香港人有打不死精神,不過佢話聽聞家寶被架空,唔知發生乜事,佢話:「如果佢(新老闆)咁做,係佢嘅損失,家寶係好上司好老闆好朋友,如果唔要佢,佢喺出面一定好搶手。」黎燕珊又話今日都有問家寶收傳票上庭嘅事,仲話:「希望佢平安解決,如果打工打到坐監好唔抵,到時我一定同佢舉牌請願。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載