蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年09月19日

【短片】【FFx登陸蘋果3】16歲Christy夠硬淨畀人鬧都仲識笑

(攝影:陳志嵐)
建立時間 (HKT): 0919 06:00

噚日FFx嚟到蘋果日報接受訪問,佢哋未嚟已經有10幾20人企喺唔同暗角守候,個個攞住智能電話對準門口位,為求「一睹」佢哋「風采」之餘,當然係想影相同朋友開心share啦!難得4個年紀輕輕,擺明知道大部份人來意嘅FFx成員,由落車一刻都表現得好大方,仲全程保持笑容任影唔嬲。

喺訪問當中,三位成員楊澤怡(Shirley)、潘穎琳(Mizaki)、李詩詠(Ceci)都有真情流露而落淚,今年只有16歲嘅周葆諭(Christy),雖然係全隊年紀最輕,性格亦最硬淨,但噚晚佢見到幾個拍檔喊到嗦嗦聲,眼角都有淚水。Christy仲話:「我本來講過唔喊架,我自認樂觀,畀人鬧,我睇到都笑,覺得啲人幾有創意,但我認致命點係屋企同學校。」

Christy同Ceci、Shirley一樣都喺單親家庭長大,仲讀緊中學嘅佢,一直隨父親生活,坦言從小就想有父母同佢慶祝生日,得到佢哋嘅愛,可惜就算坐埋食餐飯都只係一個形式。

Christy話:「我屋企唔係一個正常嘅家庭,父母都係分開咗,爸爸要做兩份工,我中一就開始做嘢,但係中一我可以做到啲乜?依家叫做大個少少,先所謂有能力負擔下自己嘅書簿同食飯錢,呢個係我惟一做到嘅嘢喇!」

正所謂家家有本難念的經,相信FFx四位成員喺呢4日都已經接受晒所有人對佢哋嘅負皮架喇!鬧夠咯,咪放長雙眼睇吓佢哋有冇進步囉!都係嗰句,畀條路行吓啦!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載