蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年09月28日
馬上成為壹會員

【短片】【KO港鐵職員被起底】測量師劉卓軒:佢哋可以改善吓態度

(攝影:陳俊強)
建立時間 (HKT): 0928 06:00

噚晚有條片喺facebook瘋傳,截至今日中午已經有1萬4千幾個分享,接近77萬幾人睇過。條片講乜?有乜咁吸引?

是咁的,話說前晚大約11點左右,有一個後生仔坐喺觀塘港鐵站近apm出口,好投入咁自彈自唱《高山低谷》,點知唱唱吓有個港鐵職員走埋去驅趕,仲好勞氣咁同個後生仔講:「先生呢度唔可以唱歌㗎!」正當個後生仔想同佢解釋:「我係根據......」呢位港鐵職員就搶白咁話:「呢度唔可以唱歌㗎!你聽唔聽清楚呀先生!清唔清楚呀先生!你根據啲乜呀!」

難得個後生仔EQ高,唔單止冇發脾氣,仲好禮貌咁叫個港鐵職員:「鄧生先,你冷靜吓先!」不過,個港鐵職員唔單止冇冷靜到,仲越嚟越激動咁,最後仲用對講機叫多咗一位同事嚟支援佢添,不過,呢個後生仔最後就仲用測量師嘅身份同呢位港鐵職員講,話根據地契資料顯示,嗰個位置並唔係港鐵範圍,所以佢唔可以話佢佔用咗港鐵嘅地方,即時引嚟現場圍觀嘅人拍掌叫好,網民仲讚後生仔一句就K.O咗個港鐵職員。

蘋果今日聯絡到呢位唱歌男,佢個名叫劉卓軒(Hinry),今年24歲,係一位獨立歌手,上年曾經參與《中國聲音3》香港區海選,仲擊敗過千個參賽者攞到冠軍,以素人身份去上海比賽。

講返當晚件事,Hinry話:「其實呢件事發生喺前晚大約11點左右,我啱啱係觀塘做完嘢經過嗰度,因為之前都有同朋友研究過嗰度係咪可以唱歌嘅,因為我哋一直都有做類似嘅演唱,咁啱嗰晚有結他同音響喺身,於是就坐咗喺度唱,大約唱咗一首多啲就有港鑼職員出嚟趕喇!」

Hinry承認自己當晚都有少少嬲,主要因為港鐵兩位職員嘅態度都唔太好:「我覺得佢哋可以改善吓佢哋嘅態度,其實我唔係特登要講自己係測量師,因為我都啱啱辭咗職,準備全力搞音樂,但我真係想同佢講,我係有了解過,嗰度真係唔係港鐵範圍,所以當晚都有同佢講,話可以用嘈音或者阻街嚟趕我,但唔?以話我佔用咗港鐵嘅地方。」

Hinry今日帶埋結他接受蘋果訪問,仲喺唔駛畀人驅趕,舒舒服服嘅環境下演唱咗前晚喺港鐵,未唱完就畀人驅趕嘅《高山低谷》。問Hinry會唔會以後唔做街頭演出?佢就話唔會有影響,仲話已經習慣咗,基本上每次演出都會有警察戒入。Hinry話:「其實有啲例,好以嘈音同阻街我都明白嘅,會盡量配合,但有一條例叫行乞,但我哋係賣唱,外國都好流行,唔明香港點解容納唔到,而且行乞同賣藝係唔同!」

Hinry仲話有一條例係針對公開場合演奏樂器:「我聽過啲法律界朋友講,呢個應該係港英政府係60年代定出嚟,嗰時怕啲人聚集做成混亂,但今時今日係咪有必要去修改一下呢!」

另外,有音樂人發起喺今個星期日攞樂器坐港鐵,Hinry話佢自己都簽咗名支持,但嗰日要錄音,唔知去唔去到。Hinry話:「其實我哋做音樂嘅人有幾多錢吖!加上好多仲係學生,冇可能次次call車出去。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載