蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年10月28日

【老蕭轟陶傑】遭蕭若元插「人渣」陶傑大反擊:上網只睇一流人物嘅嘢

(資料圖片)
建立時間 (HKT): 1028 06:00

已經66歲、人稱老蕭嘅蕭若元,同57歲嘅陶傑,人稱香港名嘴,上月底蕭若元喺佢嘅網上節目《蕭遙遊》大鬧陶傑人渣,事緣陶傑早前發表敍利亞難民言論,佢認為歐洲國家應該將啲難民拖返出公海,唔好收留佢哋,成為導火線令老蕭開火。

不過有政界人就將呢事件,同下個月區議會選舉拉上關係,因為兩位名嘴分別有支持候選人參選。老蕭嗰便就有《蕭遙遊》主持代表出選,陶傑仲犀利,先成立咗一個「青英會」同網媒,仲搵咗十優港姐麥明詩位男朋友林作參選區議會。不過林作喺地區得到建制勢力支持,令人質疑陶傑到底係咪建制派嘅「化妝師」,呢啲係後話。

講返兩大名嘴鬥嘴,網民熱烈討論已經令到花生指數上升,老蕭除咗針對陶傑話「驚有ISIS嘅人混入難民」,所以唔應該接收而鬧對方人渣之外,仲重提陶傑當年被傳喺九龍塘帶女爆房,為避開門口狗仔隊而用廁紙包頭,又話佢為咗200萬,而幫楊受成寫自傳《爭氣》冇骨氣,講到陶傑電台節目《光明頂》以悶嚟形容,聲線似律師樓嘅「師爺」,又拉埋陶傑位尊翁落水,重提佢曾任職左報《大公報》副總編輯嘅歷史。

今日有雜誌就搵咗陶傑回應返老蕭嘅指控,佢自然唔係省油嘅燈,佢喺訪問話同大家層次唔同,亦冇聽老蕭嘅網上節目,因為上網只喺聽第一流嘅人講嘢喎。陶傑首先就解釋話:「敍利亞難民應該俾返中東國家帶頭收容。」

唔明點解要歐洲國家做,對於「人渣論」,佢仲抵死話「每日都有五毛話我係人渣」,仲補充話自己時間好寶貴,上網只係會睇啲一流人物嘅嘢,亦都冇時間浪費喺自己睇唔起嘅人身上,亦都冇睇過老蕭嘅節目。

講到幫楊受成寫自傳,陶傑承認收咗7位數做代筆,但最重要係學到嘢喎,又話:「只要有經歷嘅人都唔會拒絕,最想幫李嘉誠寫自傳,陳振聰都有興趣。」提到過往幫報紙寫社論,陶傑當乩童,報紙老闆上身就得,因為社論就即係老闆立場,到時就可以好似染髮劑咁黑變白,白變黑都得,得咗。

而雜誌就呢番言論再搵老蕭解讀,佢引用美國哈佛大學舊年一本書話:「世上有百分之四嘅人都係人渣,特點係冇同理心」,老蕭認為唔理難民死活,就係冇同理心嘅表現,佢界定名嘴應該具備口才同知識,暗示陶傑呢方面未夠班,左派同右派都未分得清楚。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載