蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年11月04日

【短片】【亞姐又嚟】51歲都嚟選美前主播特登辭職參選

(攝影:陳志嵐)
建立時間 (HKT): 1104 06:00

亞視今年9月公佈獲新股東中國文化傳媒國際控股注資,這股紅色資金即揼水100億解財困,亞視近日集中火力籌備亞洲小姐選舉,並將於下月18和20日分兩天舉行總決賽,而今日則喺大埔總台安排2015亞洲小姐競選嘅港澳賽區海選面試,現場有12位佳麗換上泳裝見傳媒同評判,年齡最少係16歲中學生1號周婷,最大係51歲嘅4號施熙瑜,其實年過半百嘅施熙瑜早於4年前都參加過亞姐,估唔到落選後又捲土重來,看來佢對選美樂此不疲。

今日嘅參賽者質素偏差,當換上泳裝後高下立見,其中1號周婷、3號李方媛、5號吳愛瑋同8號伍穎琪算較省鏡,尤以22歲嘅8號伍穎琪最養眼,驟眼睇落去係「A貨朱千雪」。

7號肖雨涵則大騷33吋湯碗胸,同時再送肋骨一排,中英混血混兒6號蔡優美腰圓背厚,評判都勸喻佢要減肥,12嘅林翠明嘅36吋巨躉成全場蘿霸。10號包涵係亞視前財經主播,11號李婉儀曾於2013年參加過中華文化小姐同今年港姐,但就全部落選,2號何雨薇憑一對鬥雞眼同9號秦嘉璐嘅騎哩怪步堪稱「出位Twins」。

當才藝環節,4號施熙瑜演繹一曲《似水流年》時甩嘴,佢話:「2011年我係中途被淘汰,但我今次再參加係有信心,驚就唔會嚟,今年入唔到圍,明年後年會再接再勵,希望選到有名次為止。」大熱嘅8號伍穎琪擘腿展示一字馬,正在公開大學讀書嘅佢充滿信心:「我諗優勝在笑容,有人話我似朱千雪。」9號秦嘉璐懶理被嘲騎哩,佢用普通話回應:「我未有太大感覺,因為看不到自己,我的甫士是自己照鏡扭動時擺出來。」前主播10號包涵谷胸大跳辣身舞,更來自摸動作,佢表示今年10月已辭職,畢竟亞視員工不符合參賽資格。

此外,今日評判陣容有楊玉梅、劉錫賢,亞視副總裁趙汝強同亞視助理總監張添榮,問到趙汝強會否對前主播偏私,佢話:「佢各方面都大體。」港澳賽區中將挑選兩到三位佳麗入圍總決賽。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載