蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年11月21日

【開門見「閂」】頂唔順亞視拖字訣 戚黛黛解約唔撈

兩張相找不同,就係一張係合作(左圖),一張係取消合作。
建立時間 (HKT): 1121 06:00

出年4月1日被釘牌嘅亞視,今年6月宣佈有新投資者入主,新投資者係山東商人司榮彬,雖然新老闆上場後,亞視聲稱未來6年投資51億發展,但事隔5個幾個月,唔單止通訊事務管理局,未批准亞視嘅股權變動申請,亞視幾乎個個月拖糧,而且之前聲稱會開嘅新節目《開門見山》,播映日期一拖再拖,原本今個月初回巢接手主持呢個節目嘅戚黛黛,都頂唔順亞視拖字訣,就算同亞視簽咗約都決定解約唔做。

亞視其實今年2月已經宣佈會做呢個講民生、為朱慧珊度身訂造嘅《開門見珊》,節目原本8月推出,結果拖到9月,朱慧珊俾亞視拖到勁冇癮,決定約滿離開亞視唔做,而原來節目名《開門見珊》亦因為咁而改名《開門見山》。

朱慧珊唔做,亞視急急搵之前炒咗嘅戚黛黛回巢,拍住蔡國威同楊正軍一齊主持,今個月9號,戚黛黛返亞視簽約,仲喺facebook好開心咁上載咗張喺總台門口嘅相話:「合作愉快!」點知到咗噚日,黛黛喺fb貼同一張相,但就話:「未開始合作已經要同你哋取消合作!傾咗幾個月,我都唔想,不過有時你們做嘢真係好搞笑!當發咗場夢啦!」噚晚記者打比黛黛,問佢究竟發生乜事,佢好無奈咁話:「本來傾成咗做《開門見山》,但時間上佢哋有變動,0依家合作唔到。」

據知黛黛已經幫亞視拍好晒宣傳片,但亞視又再改期改到唔知幾時出街,所以黛黛決定同亞視解約唔做。呢個節目由原本8月出街拖到而家起碼改咗6次,據知改期原因係新老闆一蚊製作費都唔批,試問冇budget又點做節目,所以唯有改期又改期,睇怕個節目「未開門已見閂」!

其實唔單止呢個節目,據聞原本9月出街由蔡國威主持嘅gameshow《我是股神》,亦因為上頭唔批budget而一拖再拖,至於亞姐選美同《感動香港》重有得做,全因為有贊助商揼錢先可以撐落去。

今日打比蔡國威,對於戚黛黛唔做,威仔話:「公司一路叫我哋等消息,一路冇通知我哋會唔會取消或者點樣,我見黛黛咁寫,都有問佢發生乜嘢事,先知道佢同公司又暫時選揀唔合作住。」

講到另一個新節目《我是股神》又冇晒聲氣,威仔話:「作為藝人,我哋要做嘅嘢都做晒,拍咗demo、造型照、宣傳片,都係一路等緊開節目,一路公司都話要等消息,去到呢個moment,我都唔會點理會啦,公司一路講唔實幾時比我哋聽,咪唯有一路等囉。」係咁等,亞視個牌都就完啦,威仔就話:「都係㗎,感覺上係未知點樣,梗係希望佢哋盡快大搞啦,剩番落嚟時間真係唔係好多,得番4個月。係咪擺晒資源集中做亞姐同《感動香港》呀?呢樣我哋真係冇辦法知道嘅。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載