蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年11月30日

【網絡挑機】成班Youtuber入大台變入藍絲陣型狂踩亞視

建立時間 (HKT): 1130 06:00

今日一班Youtuber起勢炮轟TVB,皆因佢哋齊齊幫TVB錄影一個叫《網絡挑機》嘅節目,聲稱可以喺TVB盡情鬧TVB,聽落真係夠晒不可思議啦。咁究竟今晚呢集有咩咁爆呢?


自嘲篇:
成晚篇幅都好盡情咁俾一班Youtuber喺TVB個鏡頭面前大嗌:「TVB冇人睇o架啦!」「o依家電視好悶。」嘩,晚晚睇開搵阿媽BBQ大結局嘅師奶,當然覺得好破格啦。

Hardsell篇:
正當一班Youtuber嗌TVB好廢之時,TVB就搵個王祖藍出嚟Hardsell,「BBQ可以娶華姐」「BBQ可以買億萬豪宅」「BBQ可以紅遍大中華。」

打擊亞視篇:
節目介紹一班Youtuber時,好似司徒夾帶拍過咁多片唔播,係要播一條佢笑亞視冇糧出嘅假百萬富翁抽水片嚟播,之後仲借阿叻把口,話TVB養起唔少人,有糧出就係對行業好。

藍絲陣型篇:
成晚高潮就係,班Youtuber無啦啦入TVB就變咗入藍絲陣型,好似訪問阿叻陳百祥,就借陳百祥口係咁講「佔中夠話多人啦,咪又係嗰一萬幾千人。」司徒夾帶話TVB「因為獨大,獨大咪腐敗囉」阿叻就話:「唔係佢想獨大,係對手差啫,有能者居之,我做.COM時(東方魅力)你應該未畢業。」

司徒問電視業係咪失衡?阿叻又乘機寸亞視:「即係業績唔得啦,你估葉家寶咩?而家糧都冇得出,俾人審,個個有飯開,嗰間公司咪啱嗰囉」問佢點解認叻咁叻?阿叻就話:「我不知幾謙呀陰公。」司徒話o依家班後生仔面皮薄,阿叻又乘機狙擊黃之鋒喎:「黃之鋒邊係?周永康點會面皮薄呀?你哋嗰啲慢必細必(應為快必)乜都噏,噏餐死喺立法會點叫面皮薄。」

之後又去訪問王晶,原來又係比佢想當年認叻,王晶話:「你哋係網上嘅游擊小卒,俾你哋Replace佢(電視業高層),你有冇本事?你猛話人膠,你可能仲膠。」Youtuber問佢要決心改變呢一行,要點做?王晶一句:「入行」入TVB?王晶話:「你要改變TVB你就入嚟改囉,當年我就係努力入嚟,我都改咗好多O架,如果唔係你有乜資格話人唔得。」

王晶好似講到,TVB入面冇後生仔開緊工又想改變咁,其實套嘢,真係支持緊行創意嘅後生仔?

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載