蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年12月20日

【短片】【江湖猛人】曲赤坦認係「江湖二代」:爸爸拍過多部電影

建立時間 (HKT): 1220 06:00

曾跟連詩雅同陸永嘅索爆人妻Rainah舌戰爆慾照嘅Rapper曲赤,三年前又被前妻希媛鬧爆疑搭上小三許穎(Phoebe)搞到離婚,曲赤除咗緋聞精彩絕倫之外,原來佢嘅家族背景好複雜,據知係「他來自江湖」二代,爸爸馬天耀同大伯馬德(綽號)同江湖人物「上海仔」(郭永鴻)都屬同一幫派,來頭甚猛。

曲赤接受本報電話訪問,坦承自己嘅江湖二代身份:「係!爸爸之前其實都係生意人,做過好多唔同生意,包括開地產舖賣樓、亦拍過好多部電影,自己想寫首歌向爸爸拍過嘅電影致敬,例如自己好鍾意佢拍嘅《轟天綁架大富豪》,講某個富商兒子被綁架,呂良偉同葉童做嘅,自己會將爸爸拍過嘅電影剪輯成MV,因為佢為電影付出,拍過一啲好好睇嘅戲。」

曲赤嘅爸爸早已過世,當年有報道佢係跳樓身亡,曲赤話:「2003年佢患咗癌症,當時自己仲細唔識處理,o依家媽咪都有癌症,因為我用自然療法幫佢,o依家身體狀況好好多,希望媽咪會冇事!始終自然療法唔係100%醫好人,只係機會大啲同令人舒服好多。」

問曲赤入行前曾否加入幫派?佢話:「冇冇冇。」當年同連詩雅、陸永老婆拍拖時,兩人知道佢嘅江湖二代背景嗎?曲赤話:「唔知。」擔心自己嘅背景會影響喺娛樂圈發展嗎?曲赤話:「唔擔心,呢行好多藝人,我唔開名,佢哋都可能都係江湖二代,但屋企事唔係好關你事,因為本身唔係。」圈中有人知佢嘅背景嗎?曲赤話:「冇乜人知。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載