蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年01月12日

【短片】【繁忙兒童合唱團】毛記分獎禮「小劉華」歌詞唱「老母」 阿媽撐:唔係粗口

建立時間 (HKT): 0112 06:00

噚晚喺現場睇咗《毛記電視第一屆十大勁曲金曲分獎典禮》,真心講,全晚高潮一浪接一浪,「繁忙兒童合唱團」嘅表演,絕對好睇過好多歌手嘅演出,兼且幾首歌《Sir來了》、《測無驗》同《完咗暑假》嘅歌詞,反映現今香港學生哥(特別係小學生)嘅刻板學習、受父母同學校施壓催谷,配合台上嘅學生投入演唱———但一個個原應跳脫嘅小朋友,個個盡顯無奈表情,真係睇到都心0翕,作為家長嘅觀,睇到都只有苦笑。

「繁忙兒童合唱團」壓軸安排一名小朋友扮成無間道嘅小劉華,獻唱一首《補充練習無間做》,歌曲改編自《無間道》,歌詞內容概括講學生花盡每日時間做功課練習,目的只係為討好家人,當中嘅歌詞「明明我已晝夜無間想討好老母」,聽到呢度——有啲家長就覺得,咦,歌詞好似有啲過咗火位,又問:「台上演唱緊嘅小朋友,究竟知唔知自己做緊乜?」

呢位小劉華(佢叫劉小華)嘅媽咪喺完騷後,就喺fb留下回應,佢話:

「多謝毛記電視!多謝腦細!
俾皓嵐有呢個機會成為劉小華(一晚咁多)。
好感謝大家嘅fb留言,WhatsApp訊息,你哋對皓嵐嘅愛,我完全收到晒!

「其實今次呢個嘗試,我都係懷住忐忑的心去決定。首先我係買唔到飛嘅Loser,我一家都好鍾意毛記電視,聽到腦細搵我嘅電話真係好開心,但另一方面,依家做家長其實好多時會好無辜咁承受社會壓力,我仲要剛剛成為學校家教會主席,但最後我明呢首歌意思,亦有問過皓嵐想唔想改變香港教育模式,所以,得出結果,呢件事一定要做!

「我好感動皓嵐努力完成表演,最感動係佢知道人哋讚佢,要有禮貌答多謝,對每一個讚佢嘅人佢都有講,所以我亦真心多謝咁多位網絡上、WhatsApp上嘅朋友,可以令大家享受表演,其實係最重要嘅!

「不過,我最希望係大家記得呢個表演,好好諗究竟可以做啲咩為大家嘅下一代造就更好嘅學習環境,同如何改革現今香港嘅教育模式。
「祝香港所有小朋友可以有快樂的童年,用自己方式認識世界,創造屬於自己的人生!」

以上小劉華媽咪嘅po獲得千幾個讚好,對於被指歌曲用詞粗鄙,要小朋友唱「老母」,小劉華嘅媽咪就喺fb回應:「其實唔加動詞同助語詞,『老母』唔係粗口。老母,即媽媽、母親、娘親,意即母親,其中『老』字與『老師』、『老闆』一樣,同為尊稱之意。」

有網民亦回應:「皓嵐及媽媽,謝謝你勇敢做呢個表演,為其他小朋友發聲,明白你做呢個決定既壓力,但願你同仔仔都好好享受讚賞。」、劉小華辛苦了,主席辛苦了,香港教育條路係難行,但大把家長一齊行,共勉之。」

另外,小劉華嘅媽媽澄清,繁忙兒童合唱團其實係,真‧熊熊兒童合唱團,又話小劉華本身無fanspage,又叫大家follow佢嘅ig。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載