蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年01月15日

【短片】【真‧毛記主播專訪(7)】驚唔驚返唔到內地?東方昇:冇得驚

建立時間 (HKT): 0115 06:00

頭上永遠纏住染血紗布嘅東方昇,每次報新聞都保持住一副就嚟爆血管嘅亢奮狀態,採訪時更係遇神殺神、見車撞車嘅大無畏心態:「好多人覺得我嘅代表作係書展護送梁齊昕,其實我最有印象係港鐵扮水貨客幫學生運樂器,當時我叫啲手足記得望實班港鐵職員,點知佢哋真係出手幫我哋,呢吓真係估你唔到!」

自稱愛國不愛黨嘅佢,家鄉喺上海,喜歡到內地遊山玩水:「以前返上海你見到啲人好純樸,但日子耐咗,上海啲人都變得好商業化。好多人問我驚唔驚遲啲冇得返,其實暫時都冇得驚住,有啲嘢覺得啱,選擇講,唔好諗咁多。」

比起愛國,東方昇其實更愛香港,原因無他,純粹因為係自己出世嘅地方:「反而我唔係好鍾意香港人,有陣時太過羊群心理,冇乜獨立思考。所以我做呢度,都想做啲嘢改變大家,令到無論個地方定啲人,都係我鍾意。」

東方昇之前喺天比高跟過俞琤,亦喺商台做過創作,現時擔任AssistantDigitalManager,坊間以為佢哋喺毛記工作,有很大創作空間同自由度,但東方昇話佢哋其實同一般打工仔無異,甚至辛苦得多:「我八點半會返到嚟,腦細就會捉住我傾今日做乜議題,做《六點半左右新聞報道》。之後寫稿,拉佢哋拍嘢,跟埋剪片,最尾睇埋條片先走得。」

講到「腦細」林日曦,喺商台同對方共過患難嘅東方昇直言,對方雖然經常黑面,但內裏其實warm到爆:「舉個例子,我同佢喺天比高做嘢嗰陣,嗰時公司喺天水圍,我住大埔,佢就日日車我返公司,我哋喺車上面好少講嘢,我諗呢段時間都維持咗2、3年,其實有時我唔想講嘢,佢會明白,但好多嘢在心中。」


東方昇Profile
藝名:東方昇
真名:真.王嘉偉
年齡:29歲
成毛孩前:同林日曦喺商台、天比高共事過
毛孩之育成:林日曦拉隊搞《100毛》,順利過檔

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載