蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年01月23日

【藤岡癲撐廣東話】藤岡靛效應推動華語阿Dean意思原來解阿癲

建立時間 (HKT): 0123 06:00

喺日本爆紅嘅35歲男星藤岡靛(DEANFUJIOKA),04年曾以Dean之名喺香港發展,最較港人熟悉有何韻詩嘅《勞斯.萊斯》同埋《睡王子》MV,06年再為香港導演麥婉欣執導嘅《八月的故事》擔任男主角,之後被柴智屏睇中轉攻台灣接拍偶像劇《轉角遇到愛》、《不良笑花》同埋電影《夏天的尾巴》等,不過上年回流日本終於大紅大紫,今年升呢拍住深田恭子喺新劇《請和這個沒用的我談戀愛》中做男一。

藤岡靛為噚晚嘅TBS節目《A-Studio》任嘉賓,佢向主持笑福亭鶴瓶大談喺香港發展幾年嘅生活,自爆當年改名Dean係方便打入香港市場,佢話:「Dean同廣東話Crazy同音,始終我是外國人,喺香港發展比較困難,所以改個比較特別嘅名。」佢仲即場教觀眾講廣東話,例如「唔該」、「我唔知道」,形容廣東話同普通話係兩個唔同國語言,正如日文同韓文嘅分別,有日本fans表示為咗要睇番偶像以前喺香港同台灣嘅舊作,開始學中文,甚至廣東話o添!

呢個節目亦找來藤岡靛識於微時嘅好友,當中包括訪問洪金寶兒子洪天翔。對於新劇拍檔深田恭子公開大讚藤岡靛多才多藝,瓣瓣掂嘅佢唔止識拳擊、烹飪,亦有即場彈結他,真係冧死台下女觀眾。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載