› 選擇地區
三藩市
紐約
洛杉磯
其他美國地區
香港 台灣 北美
 
2016年01月28日

【港龍變天】鄧達智為港龍設計空姐制服16年:時裝嘅嘢咪望番轉頭

一張圖重溫港龍制服變遷。
建立時間 (HKT): 0128 06:00

06年被國泰收購嘅港龍航空(Dragonair),今日終於正式改名做國泰港龍航空(CathayDragon),今次易名,港龍嘅品牌設計包括機身logo,應該都會受影響。Dragonair將會成為歷史,據知就連港龍空中服務員亦有機會改合約,撥入國泰旗下。不過網民對國泰港龍個赤紅新logo,好難唔皺眉。

又成為那些年嘅回憶,有網站整理文章,loop返港龍空姐制服look回顧之餘,文中更提及,幫港龍設計制服嘅鄧達智(William),曾批評劉培基於99年為國泰設計之制服「易走光、易露腰」。

鄧達智即於fb轉貼此post,留言:「報道失實!同行之間,怎會公開批評另一同行的設計?更何況大哥劉培基!設計制服跟設計自己系列不同,限制非常多,出街現眼人前,已經歷不少『高層』指指點點,經常性已非設計師原意。」

《蘋果》就打咗畀鄧達智瞭解,首先佢就解釋番件事:「每個設計師都會有睇法,會有自己主觀睇法,我哋(指與劉培基)係同行,又咁熟,唔會喺傳媒面前講,會傷和氣。」

其實呢段報道,係出自2000年9月,《港龍換制服增聘500空姐》,負責設計港龍新制服嘅鄧達智當時就話,新制服連身裙設計,令空姐「擒高擒低」工作後仍然保持儀容整齊,又批評國泰空姐嘅「兩件頭」制服,舉高手時容易「露腰」,彎身時高衩短裙又容易走光。及後劉培基回應時就反駁:「絕對冇可能走光」,仲話:「全世界嘅女人,無論幾肥幾大隻,著起國泰套制服,一定會見到條腰!女人一定要有腰。」

William回憶番,確曾接受訪問講同空姐制服睇法,但當時講嘅唔係劉培基設計,而係維珍:「我設計嘅港龍制服係連身裙,絕對冇機會露腰,不過有留意到當時維珍空姐嘅制服係白恤衫半截裙,佢哋工作時有機會令件恤衫抽高,令到空姐尷尬,所以我設計冇做兩截。」

William幫港龍、香港航空、港鐵設計過制服,對於網民盛讚歌頌港龍制服靚,會否覺得一個時代終結,難捨之情,佢就話:「我97年開始幫佢哋設計到13年,期間國泰搵我投標,因為做緊港龍就冇投,嗰時我設計都係以簡約,方便佢哋做嘢為主,2013年嗰時好多員工都唔捨得,成日捉住我影相。依家合併咗,唔會特別唔捨得,我自己係一個好lookforward嘅人,過咗嘅嘢唔好睇番轉頭,尤其係時裝。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載