蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年02月23日

【簡體的J5?】網民發起投訴無綫出簡體字幕揚言「台」已del

(無綫J5電視截圖)(網上截圖)
建立時間 (HKT): 0223 06:00

無綫由「高清翡翠台」變身「J5」首日播放,雖然話無綫本來都有普通話新聞報道,不過「普通話新聞報道」及「普通話財經報道」如果係用簡體字,真係嚇到一眾網民O嘴,無綫電視外事部副總監曾醒明就話其他新聞財經節目同特輯,全部係廣東話及繁體字幕,只係晚上8時半黃金時段以45分鐘普通話同簡體字報道新聞,主要服務講普通話,又唔識繁體字嘅觀眾!

呢個咁體貼嘅「服務」確係令人難以置信,唔少高登巴打發起向通訊事務管理局投訴J5出簡體字幕,唔少網民表示已投訴,有網民表示:「投訴咪又係罰錢,TVB0.1s廣告都夠俾。」另有網民稱:「內地劇同普通話都算,但簡體字一定接受唔到。」亦有網民表示:「你播普通話新聞,fine,本身就有播開,而且台灣、新加坡、馬來西亞的居港人士都可以睇,但唔該唔好出簡體字,呢度仲喺香港啊!唔該!」亦有網民心灰:「簡體的J5?我唔識睇…我唔會睇…唔使旨意我再睇TVB…bye。」

有唔少網民決定成個台刪咗J5台,網民反對「刪台」行動,「齋del台同掩耳盜鈴冇分別,cctvb過一排推到所有台都係普通話殘體字咁點?到時又del台避開就算?」

呢個J5台每逢晚上8時半黃金時段,就開始播《普通話新聞報道》、《普通話財經報道》、《普通話天氣報告》及《普通話新聞檔案》等,而且TVB網介紹J5台係「一條財富及知識並重的全新頻道,播放自製財經資訊節目,及外購紀錄片、劇集、電影及綜藝節目」。

即係J5台唔止簡體字報新聞,遲啲都會播埋唔少大陸劇,話晒之前TVB連強國膠劇《西遊記》CG差成咁,亦揀喺黃金時段播放,O依家連普通話新聞都用簡體字,早前教育局疑逼學生學簡體字,已惹許多網民反感,現時又再出現簡體字幕,唔怪之得回響咁大嘅!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載