蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年03月04日

【亞視熄機】被拖數兩年欠幾廿萬 盧先生:配音節目停咗幾個月

(採訪、攝影:馬建華、陳志嵐)
建立時間 (HKT): 0304 06:00

效力亞視近46年嘅盧傑群,現時任職配音組,盧先生出身於麗的映聲第四期訓練班,曾參加過幕前演出,又做過副導演,後來加入配音組,佢話:「相信大家都好熟識我聲音,所有片集都有,包括歷史劇《雍正皇朝》、《三國演義》、《男兒當入樽》嘅旁白都係我講,自從2000年之後,強積金實行之後就改咗制,一直畀外判公司,最受害係我哋,因為外判公司冇找數,由2014年中開始,都已經冇找過數畀我哋。」

今日去到最後一日,心情點樣?盧先生話:「當然係難過,自己服務咗大半生,成半世人,一直冇離開過,可以話係最撐亞視一個人,當然唔捨得,其實喺呢度工作好愉快,係一個大家庭,所以我一直都冇離開過,第二間叫我去我都冇去。」

講到遣散安排﹖盧先生表示:「好麻煩,舊年年尾嘅時候,行政總裁同我哋開會,應承過年前找晒數畀我哋,但最後都冇,所以直到依家都係冇。」一直唔出糧,員工係抱住咩心情呢?盧先生話:「其實已經停咗,o依家都冇買片,冇配音節目,停咗幾個月,之前嗰啲一直冇找到咁解。」亞視爭佢幾多個月糧﹖盧先生透露:「幾廿萬,當然唔係我自己,由2014年中開始,接近兩年,未出過票,我哋係外判公司,涉及都廿幾人。」有咩打算﹖佢就笑笑口話冇乜打算,睇公司安排。佢表示今日返公司主要係執嘢。

講番盧先生所講嘅外判公司,盧先生續指:「(亞視)為咗避強積金,所有嘢都變咗外判,我哋幾個導配成立咗5間公司,承接番所有配音節目。」外判員工要追討欠薪,唔係向亞視追,而係向外判嘅負責人?盧先生話:「其實都有,工聯會、勞工處都有同我哋追緊。」
今日亞視收台,邊個要負最大責任?盧先生話:「我諗主要係股東嘅事,其實可以做落去,只不過佢哋自己搞成咁。」會唔會覺得自己被受騙﹖佢話:「都唔會,自己咁耐都做到成績出嚟!」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載