蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年03月21日

【短片】【無綫權鬥】新劇《親親我好媽》疑嚴重飛紙仔曾勵珍下令停廠兼執劇本

建立時間 (HKT): 0321 06:00

無綫新劇《親親我好媽》開拍以嚟是非多多,好似呢部開拍前,本來搵咗麥長青(麥包)做男主角,但臨門一腳,麥包被人飛出局,換咗黃智賢,令到麥包首次擔正做男一夢碎,而傳聞因為一向賞識麥包嘅無綫製作部戲劇製作總監曾勵珍,同助理總經理杜之克唔妥,令到麥包成為佢哋角力之下嘅「犧牲品」。

有份拍呢部劇嘅演員,除咗黃智賢之外,仲有江美儀、陳敏之、呂慧儀同韋家雄等,部劇今個月初開拍,估唔到一開拍,又有風波喇!

《蘋果》收到可靠消息,呢部由關永忠監製嘅劇集,唔止嚴重飛紙仔,劇本方面仲寫到上文唔接下理,劇情完全唔銜接同唔合理,有份參與嘅演員發覺對白好有問題,都有主動同編審反映意見,而助導亦因為劇本問題,而同編審拍晒枱吵大鑊。

據知珍姐知道之後,即刻喺上星期叫晒演員同幕後一齊開大會,下令由聽日開始停廠,兼停晒外景4日,搞好劇本先至叫人再開工。

其實劇組book晒演員同外景地方及廠景,要停工係牽連甚廣,對電視台嚟講係好大鑊嘅事。聽聞今次珍姐要停廠同停外景,事前完全冇通知杜之克,令到杜之克好㷫。而自從舊年10月原本擔任無綫節目發展分部總監嘅彭濟材「被退休」之後,劇本創作部門由杜之克睇埋,劇本有問題,當然關杜之克事。

一直有傳珍姐地位受到動搖,杜之克近排搵番前無綫監製劉家豪同梅小青兩公婆回巢,同珍姐平起平坐做戲劇製作總監,要脅珍姐地位,今次珍姐因為劇本出咗問題而搞呢個大動作,好明顯係比番啲顏色杜之克睇。連番高層勾心鬥角,唔單止精彩過大台劇集,如果用嚟拍真人騷,收視隨時爆燈呢!

對於《親親我好媽》因為劇本問題而停廠停外景,個個演員都相當口密唔敢多講。今日記者致電韋家雄,佢話:「我照rundown做嘢,其他嘢唔清楚。」陳敏之就話:「唔太清楚,忙緊外景。」黃智賢亦話:「冇嘢回應。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載