蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年03月23日

【底薪$2,000】開性商店得罪無綫 楊斯雅被雪求離仲要賠錢走

建立時間 (HKT): 0323 06:00

無綫藝人流失係人都知,花旦呀!小生呀!走得就走,連12年落選港姐,做過無綫J2節目《安樂蝸》主持嘅楊斯雅(Cindy),佢都等唔切今年年中約滿,1月就主動同公司解約,提早回復自由。

本來Cindy做《安樂蝸》主持都唔錯,有定時出鏡機會,一直安份守己,等機會,等足4年。

好奇一問,你底薪幾多?答案係$2,000。

得$2,000底薪,點樣生活?但Cindy就將本錢擺去做生意度,前年開咗兩間性商店賺吓外快,去年再開咗第三間,更親自為自己生意宣傳,結果出事,俾大台放入雪櫃,半年冇嘢做。

入雪櫃呢段日子,Cindy索性將全副精力同心機投放入性商店生意,點知越做越有景,仲有內地成人玩具品牌搵佢代言,有6位數字酬金。Cindy返去同大台商量,但大台就唔多支持。冇理由有錢都唔賺0架,最後Cindy下定決心:劈炮。

喺大台4年,Cindy大吐苦水:「自從我接受咗傳媒訪問我開成人用品店,特別係《蘋果》,公司就開始停用我。我主持緊個兩個節目都被飛起。我本身底薪得2000幾蚊,好難得先有兩個節目主持月入差不多一萬蚊,咁就冇咗。」咁………咪……即係連累咗你?

Cindy續道:「不過動新聞嘅訪問出街後,仲多人識過喺幕前做足3年,起碼演員、幕後、整頭化妝打燈嘅,終於叫得出我個名,知我開店,多咗份尊重,不過之後keep住半年都冇嘢做。」係咁等運到都唔係辦法,Cindy今年同公司提解約,翌日即獲答應,佢仲話1月離開嗰陣,仲因為唔夠騷,要賠錢走。

Cindy話喺大台工作唔受重用係絕對消磨意志,佢話:「每個月拎住一萬幾千蚊,一個月開幾日工,得閑hea吓,舒舒服服咁過咗5、6年,個人變肥,心境懶散咗。」佢仲寄語有意入行少男少女要三思:「除非屋企有資源支持,否則一定要諗清楚,要養家千祈咪入行。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載