蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年03月29日

【短片】【有錢使得鬼推磨】F4朱孝天脹爆參加大陸減肥真人騷

建立時間 (HKT): 0329 06:00

當年喺《流星花園》飾演西門嘅朱孝天,曾經迷倒萬千少女,o依家嘅朱孝天已經唔再係當年嘅西門,身形大咗幾個轉,更慘被大陸媒體揶揄為黑豬,話晒都係靚仔吖,點知近年屢次被形容為「脹爆」,更被指似「大叔」!

今次朱孝天立定決心,參加大陸一個減肥真人騷節目《燃燒吧!卡路里》,誓要變回當中嘅西門。噚日佢出席節目喺北京舉行嘅記者會,而節目嘅工作人員就於微博上載咗有份參加嘅藝人宣傳惡搞圖,就將朱孝天形容為「披薩斜塔腰」,即係話朱生條腰唔見咗囉,仲用比薩斜塔嘅圖遮住,相信朱生今次扚起心肝,肯參加減肥真人騷節目,除咗有錢使得鬼推磨外,結婚亦係一個好大嘅推動力。

之前就爆出佢將會同大陸女星韓雯雯喺瀋陽領證,記者會上,好多記者就問到佢係咪結婚,佢就只係答:「應該算是吧!」朱孝天仲主動為準老婆韓雯雯澄清過往與內地已婚男星李健傳不倫戀係節目炒作,充份做好老公護妻嘅本份。

據知,朱孝天係同韓雯雯拍戲撻着,佢大讚準老婆「因為沒甚麼過多感覺,反而覺得這麼平穩平淡很好。」問到韓雯雯可介意還未求婚就被爆已領證,佢話:「我跟她說也沒辦法,反正到時候我該補你甚麼就補甚麼,不用更擔心」。佢講因為女方係大連人,打算喺大連擺三圍。

之前吳奇隆同劉詩詩喺岩里舉行婚禮,問佢會唔會效法佢哋咁樣搞一個奢華婚禮?佢好老實咁講:「不喜歡鋪張浪費,先把程序走完,但尊重女方意願。」吳奇隆結婚,小虎隊就重聚,記者問佢到時F4又會唔會重聚呢?他直言:「不太可能,我當然會請他們,但不見得大家有空來,吳建豪婚禮我就沒去,那時候在泰國當和尚,我一個和尚去婚禮多奇怪,只能說『貧僧不喝酒』,再看周渝民,到現在也還沒辦婚禮。」

不過,朱孝天就透露,明年係F4出道15周年,醞釀合體中,但對言承旭被笑係「F4剩男」,佢笑住稱:「你怎知他孤零一人,搞不好人家私底下都幾個孩子也不一定,我不知道。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載