蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年04月07日

【短片】【蔣必文…】敖嘉年唔做大台「親生仔」北上挖金賺人仔

建立時間 (HKT): 0407 06:00

39歲嘅敖嘉年,今日就有報導爆話佢同相戀16年嘅圈外女友結婚,展開人生新嘅一頁,唔知係咪為咗養妻,佢仲做咗另一個重大決定,就係決定離開效力15年嘅大台,北上搵人仔。

效力大台15年嘅敖嘉年,發展機會不多,直至09年,佢終於憑《巾幗梟雄》裏面嘅「蔣必文」彈起,當年仲係台慶攞埋個「飛躍進步男藝員」添,之後就一劇接一劇,係大台人o依家鬧小生花旦荒之際,其實係一個好好嘅上位機會,但係敖嘉年就選擇咗離開呢個熟悉嘅工作環境,轉到大陸挖金賺人仔。

周刊報導嘅消息人士話,敖嘉年近年劇接劇,都搵到餐食,本來都好滿足嘅,不過佢去年就接咗大陸電影《盜墓筆記》,雖然戲中只係做配角,但片酬都有幾十萬,酬勞係佢喺大台一年都未必有咁多,所以佢先會決心唔做大台「親生仔」,出去闖下喎!其實大台都唔係無做嘢挽留佢架,話好似樂易玲、曾勵珍同杜之克都有挽留過佢,最係佢同高層講話改簽一年拍一劇嘅部頭合約。

講到婚事,敖嘉年今日喺電話度話﹕「都要俾番個承諾人哋,(點解咁低調,冇請圈中人?)唔需要高調啦,都冇理由要人哋去到加拿大咁達。」咁生B大計?佢話﹕「真係未plan,隨緣啦。」而佢亦承認會同大台轉簽部頭約,佢話﹕「大陸同香港都會拍劇,暫時未諗住轉行。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載