蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年04月15日

【短片】【一切從簡】董敏莉嫁律師 日本度蜜月兩年後生B

建立時間 (HKT): 0415 06:00

現年35歲、歌手出身嘅董敏莉(Monie),早前宣布本月嫁拍拖兩年,比佢年長15歲嘅律師才俊男友莊耀金,雖然Monie講明婚禮一切從簡,但結婚始終係一生人一次嘅大日子,所以準新娘亦希望可以着上靚靚婚紗影婚紗相。噚日Monie到尖沙嘴試婚紗,對婚紗款式嘅要求,Monie就話簡約典雅就夠:「Lowcut唔係好啱我,我比較鍾意有袖嘅婚紗款式,亦唔需要太多閃石珠片。」

Monie之前講過結婚只會做簽紙註冊儀式,唔打算擺酒,以免煩到人、又煩到自己,佢解釋:「註冊同擺酒放埋同一日,對我嚟講會幾大壓力,亦都煩到親戚朋友,所以同未婚夫決定每件事分開做,近排我哋都分別約唔同朋友食飯慶祝,遲啲就會同兩邊家人食飯。」

雖然婚禮唔會大搞,但原來Monie細個都有憧憬自己婚禮可以喺外國嘅大草地舉行:「之前搵過資料,原來喺外國結婚程序都幾繁複,若果喺香港大草地搞,又驚多蚊,所以最後打消呢個念頭。」

對於蜜月地點,Monie同未婚夫原打算到英國,但因擔心歐洲政局唔穩定,因此決定將地點改為日本,佢表示:「呢個honeymoon會好熱鬧,因為我哋會同10幾個屋企人一齊去,今次去完,下次就有藉口兩個人再去多次,哈哈,咁就可以成日都去honeymoon。」

至於,婚後會唔會即刻開行turbo造人?Monie就話同未婚夫已經有共識。「以前小朋友同小動物都唔係我啲friend,但近年漸漸鍾意咗佢哋,我哋有商量過,應該兩年後生B,因為我本身貧血,中醫話我身體好似一嚿冰咁,所以想趁住呢段時間調理好身體先。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載