蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年04月18日

【30大限?】欣宜恨拍拖想收花周秀娜:追求愈多愈好

(攝影:陳俊強)
建立時間 (HKT): 0418 06:00

周秀娜同鄭欣宜擔任女主角演出由舞台劇改編電影《29+1》,講述女性踏入三十歲的忐忑,其他演員仲有周家怡、蔡瀚億、金燕玲等,今日齊集銅鑼灣舉行宣傳活動。

娜姐今年正好踏入三十歲,置身其中對呢個年紀好感觸,好想搵人拍拖,身旁廿八歲嘅欣宜即話:「踏入依啲年紀,我今年有三個婚禮要去,做三次姊妹,咁多人結婚,係咪要諗下自己呢。」娜姐就話:「呢啲我已經參加咗好多年。」又異口同聲稱身邊朋友好多都結婚生仔。

拍拖係咪要搵結婚對象?娜姐話:「未到三十又驚好快過,但差唔多到時又會諗係必經啫,想搵個理解自己嘅人,同埋想話畀人知三十歲仲好後生,可以好容光煥發。」欣宜就話:「想搵個可以令我開心嘅人,可能做呢行成日都令人開心,都想身邊有個人令自己開心。」兩人都稱現時單身,歡迎追求者,娜姐話:「追求愈多愈好。」欣宜話:「我好鍾意收花,鍾意牡丹同玫瑰o架。」

此外,金燕玲今次為電影客串一日,原因係佢曾經同電影導演合作,但一日戲對方唔好意思開聲,由俞琤出面搭路,金燕玲覺得幫到人冇所謂,戲中佢演一位惡女人,係娜姐老闆,兩人首次合作,金燕玲喜歡見到電影圈有新血。

而早前在金像獎獲得女配角,好多慶祝飯要食,金燕玲話:「好多朋友好錫我,又請食飯、封利是、送禮物,我都唔好意思收利是。」親密好友蘇施黃呢?金燕玲話阿蘇幫手安排請朋友來慶祝,而今次得獎真係好開心,之前買咗百幾張飛請朋友睇戲。問愛女有冇一齊慶祝?金燕玲話:「囡囡喺倫敦未見到面,佢問我攞獎有冇多謝佢,我話有,但唔係多謝你令我得獎,係因為你乖。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載