蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年04月20日

【短片】【ViuTV推新節目】阿旦有機帶愛犬出埠「食肉獸」陳俞希挑戰全程食素

建立時間 (HKT): 0420 06:00

強勢加入電視大戰嘅ViuTV,開台兩周就成功搶灘,動搖到無綫嘅慣性收視,其實ViuTV自家製作好有創意,佢哋繼續安排緊推出新節目,旗下主持幾乎人人有份,曾參加《G-1格鬥會》嘅鄧洢玲(阿旦)、周秀娜師妹陳俞希(Hailey)同黃心美等分別會孭飛主持旅遊或飲食節目。

「格鬥女」阿旦早排拍咗旅遊節目《的士Go》,玩盡台北、台中同台南,佢抵埗就跳上的士,由司機做導遊,帶佢四圍吃喝玩樂,阿旦大讚北投浸溫泉爽爆,佢今日接受《蘋果》電話訪問時話:「我好鍾意去台灣,但呢次跟當地司機去玩寧舍唔同,佢哋未必去一般熱爆景點,去一啲地道人常去嘅地方,比較特別。」阿旦表示《的士Go》正排期推出,因為內容有趣,所以監製打算添食,下月佢要再飛台灣補拍。

據知阿旦遲啲仲會被安排拍一個有關寵物嘅新節目,有機會帶愛犬出埠旅行,阿旦話:「呢個節目公司仲plan緊,我要等通知,如果真係可以帶我兩隻狗去旅行就好啦,佢哋可以跳出狗公園,佢哋嘅騷錢,我會買零食慰勞佢哋。」

Haileyo依家每周有3個節目出街,分別係逢周六嘅《區區有樂》、周日真人騷《SE7EN》同周一嘅《借宿一宵》,佢下月中仲會出發美國拍一個飲食節目,佢會喺兩周時間去勻三藩巿、紐約同洛杉磯介紹素食,Hailey今日喺電話訪問時話:「我喺食肉獸,但呢個trip正考驗我係咪可以全程食素,我出發前一定打多幾次邊爐,隊爆食多幾餐肉打底。」Hailey即將推出嘅《借宿一宵》都周去圍去,有次去咗深圳大鵬出席二百對新人結婚活動,Hailey着住婚紗出鏡,但偏偏冇新郎,佢即場借個人夫影婚紗相。Hailey又去咗石龍燒巨型煙花,差啲發生爆炸意外,有驚無險。至於黃心美會同主持陳炳銓拍一個帶視障人士出遊嘅節目《暗中旅行》,現正安排出街日期。另有拍攝中新節目《學嘢》,安排唔同主持出埠學習新技能。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載