蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年04月26日

【短片】【溫馨遞杯】關心曾鈺成喉嚨唔舒服 長毛被指好HEHE:關你X事

建立時間 (HKT): 0426 06:00

香港第一家庭又惹是非,特首梁振英以「特事特辦」幫助細女梁頌昕拎手提行李,特首夫人梁唐青儀更以特殊人員身份進入候機室送細女登機,如果你唔係「姓梁的後裔」,真係唔好拎漏嘢!

好似曾鈺成同梁國雄(長毛)呢對「波蘭密友」,去旅行當時有帶齊嘢,早前一齊參加ViuTV開台「重頭」節目《跟住矛盾去旅行》算係擦出啲火花,日前二人出席《矛盾對著講》,由方健儀做主持,分享二人喺波蘭之旅嘅感受。

ViuTVfacebook專頁今早貼出一條片(影片連結: http://bit.ly/1VPk1IL ),主持方健儀問曾鈺成同長毛用咩動物嚟形容對方,曾鈺成話長毛係蛇,方健儀話蛇除咗惡及懶惰,仲有啲咩係似長毛,長毛即自嘲:「引誘他人,食禁果。Oh!Mygod!」即引起全場爆笑及掌聲,而長毛就稱曾鈺成係鼠,笑言蛇鼠一窩。

曾鈺成又爆長毛成日遲到,去波蘭嗰陣,同隊crew約好咗要同長毛講約早半個鐘,好似8點集合,要同長毛講7點半,曾鈺成講:「點知佢都係遲!」

長毛喺節目更稱自己交稿係用原稿紙寫,之後WhatsApp影相傳送出去,個訪問講講吓嘢,曾鈺成有啲口乾,長毛即遞個杯畀對方,呢個「密友」真係夠貼心,連方健儀都忍唔住問:「係唔係friend嚟㗎!」原來曾鈺成身體抱恙,長毛叫人買啲「咸竹蜂」,重要嘅嘢講三次,而長毛真係講3次,方健儀搞笑:「我都有啲唔舒服,我都咳,不過長毛係冇理到我,只係理阿主席,你見佢遞杯水就知。」

有在場嘅人問知唔知網上「HEHE」係咩意思,全場又再次爆笑,方健儀同長毛講:「如果你知就解釋畀主席知。」長毛話HEHE即係同性戀嘅關係:「HEHE又點,關你X事。」長毛又指,知道網上有人作咗首歌《長毛.鈺子》(影片連結: http://bit.ly/1Swcecy ),改編自何韻詩原曲《勞斯.萊斯》,但長毛稱佢哋兩個喺香港都係微不足道嘅人,承蒙大家嘅錯愛,佢都覺得非常之驚訝。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載