蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年05月19日
馬上成為壹會員

【短片】【原來唔止一個!】傅嘉莉暗交中年已婚富商遭揭劈腿即被飛

傅嘉莉再傳搭上知名富豪,之前就傳佢同肥叔叔同莊天龍有染。
建立時間 (HKT): 0519 06:00

MandyLieu由第三者,短短兩年多就坐正成為新洗米嫂,令不少「大婆」憂心忡忡……

進擊的咖啡妹傅嘉莉,前年先後搭上新加坡已婚富商肥叔叔,人夫富商、市值17億嘅上市公司CEO莊天龍,早前周刊已經爆料指莊天龍原來仲有個紅顏知己,咁傅嘉莉排第幾?

話明進擊,傅嘉莉自然識得「分散投資」,除咗莊天龍,仲識其他新朋友。今日有周刊報道就話,進擊的咖啡妹早於去年8月已經背住莊天龍,暗交另一已屆半百嘅已婚富豪。

又係人夫?又係富豪?係呀,報道係咁樣引述知情人者話。咁依家呢?散咗lu。話係因為呢位已婚富豪知道咗原來傅嘉莉同莊天龍又係「fd」嚟嘅,咁點喎,即係你唔專一啦,就係咁,怒飛傅嘉莉。

但怒飛之前,或者應該話,喺富豪發現傅嘉莉同莊天龍嘅密友關係之前——其實富豪老婆已經知晒成件事。點解會知?報道引述知情者指,進擊的傅嘉莉表現得好有誠意同呢位富豪人夫做朋友,富豪人夫亦相當受落,仲帶埋傅嘉莉出席飯局,關係一日千里。有時真人見唔到,傅嘉莉都會send下自己啲相俾對方睇,包括自己台慶著咩衫咁啦,又扭計要玩視像電話,好似樹熊咁黐身,你話有咩理由個老婆會唔知喇?知道又怎麼,有啲嘢,唔方便同人講,惟有吞聲忍氣,自己谷埋谷埋囉。

就係咁,富豪人夫同傅嘉莉做咗五個月朋友,直至男方發現傅嘉莉原來同莊天龍都份屬好友,仲有親密合照(程度唔知),自然乜乜即飛啦。

周刊都有搵傅嘉莉求證,佢就表示無辜,話唔明白呢啲謠言邊度傳出嚟,又話要講嘅之前都講晒,唔想重複又重複再重複解釋喎。

花生完畢。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載