蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年06月07日

【民生書院90周年】星級名人群集 才女陳秋霞作曲彭羚晒靚聲

建立時間 (HKT): 0607 06:00

九龍城民生書院今年90周年,原來唔少名人、藝人都係民生出身,包括魔童王維基、林建岳、向華強、指揮家葉詠詩、陳秋霞,林志美、劉愷威、陳庭威、艾威、羅力威、甄文達、林嘉欣老公袁劍偉、港台DJ周國豐、張崇基同張崇德、香港寬頻行政總裁楊主光、中華電力企業發展總裁莊偉茵、無綫前監製邱家雄同埋資深製作人蕭潮順等,睇番彭羚、林志美、陳秋霞同王維基等人張學生相,雖然相隔多年,但大部份都認得出佢哋啲輪廓。

為咗賀母校90歲生日,一班校友就發起母校搞一連串紀念慶祝活動,包括推出90周年主題曲《光與生命》,以及為母校出紀錄片等。其中首《光與生命》係由70年代音樂才女陳秋霞作曲,佢仲同80年代歌后林志美,以及退出江湖多年、只係喺2012年黃偉文(Wyman)紅館作品展唱過兩場嘅90年代歌后彭羚,三代唔同女歌手代表人物一齊合唱,仲有崇基、崇德同羅力威做和唱,新晉詞人王仲傑填詞,今次彭羚出山錄新歌之外,嚟緊會拍埋MV添!不過,據悉彭羚唔想自己出現會搶fo,所以除咗錄歌同拍MV之外,其他相關活動就唔會參與。

至於首歌嘅MV由袁劍偉監製,佢聯同幾位前《勁歌金曲》導演一齊指導新導演拍攝,而蕭潮順擔任行政總監。蕭潮順今日接受《蘋果》訪問時話:「首歌噚日錄好,稍後會拍MV,總之成個project都係由民生校民參與,好似周國豐會做VO,艾威、甄文達會參與埋MV拍攝,我哋希望搵埋劉愷威同陳庭威參與添!至於經費方面,王維基同林建岳都有出錢支持,王維基仲借埋HKTV啲貴價攝影器材嚟拍,不過佢就唔會現身MV,只係喺紀錄片出現。」

專程由大馬返香港嘅陳秋霞,今日返去民生拍攝片段,講到今次為母校作主題曲,秋霞就話:「其實為咗呢首歌,我哋早前都開咗個群組,包括作曲作詞同arrangement,個個畀唔同意見,真係嚟錄音嗰日,第一次同彭羚、林志美合作,兩位師妹雖然隔得都幾遠,但一拍即合,因為我哋已經個共識,你唱邊段,用乜嘢聲嚟唱,或者你把聲高啲,我哋自己就吓,最緊要個感情完全放到落首歌。」問到彭羚咁耐冇唱歌覺得佢唱成點?秋霞就激讚:「彭羚好耐冇唱歌啦嘛,我係作曲人吖嘛,我就將最難嗰啲俾晒佢唱,因為佢把聲靚吖嘛,唔好嘥吖嘛,咁靚把聲。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載