蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年06月08日

【短片】【監製同一人】無綫教環保?亞視《開心大發現》=新節目《乜都攪掂晒》

建立時間 (HKT): 0608 06:00

究竟係「搞」定「攪」?

搞作係「搞」,攪拌係「攪」,攪局都係呢個「攪」……究竟無綫想有搞作定攪局?

大台一直喺10點半時段主攻旅遊節目,前晚終於轉一轉口味,播出薛家燕、岑麗香及張致恆(Steven)嘅生活資訊節目《乜都攪掂晒》,仲搵咗曾志偉做第一集嘉賓。

本來呢啲生活小知識都有幾啱師奶fans嘅口味,喺節目教人食wasabi唔攻鼻嘅秘方,同埋飲管循環再用,第一集嘅平均收視有16點(約104萬人次收看)。

但係有唔少網民睇完之後,覺得同當年鮑起靜喺亞視嘅《開心大發現》,由佈景、內容甚至節目形式,相似程度極高,仲發現呢兩個節目原來都係張洪翅監製。

查實當日喺記者會,家燕姐已經俾人問過呢件事,佢尷尬話冇睇亞視。而節目出街之後,網民已經喪鬧,有人話:「喺街見到個時仲以為係ATV嘅出品。」有人仲話竟然係抄2009年嘅版本,不如索性叫「Copy搞掂晒」!

有份主持嘅Steven今日接受傳媒訪問,佢話:「我知道有《開心大發現》呢個節目,亦都知道監製同好多班底都係喺《開心》過嚟,但係從來都冇睇過。」

講到網民喪鬧,Steven話:「我又唔覺得呢啲係點樣抄嘅嘢。同大家分享呢啲知識係好需要,有啲人知道嘅嘢,唔代表全部人都知,所以我哋想將呢啲資訊介紹俾大家,主要係希望可以環保啲同慳錢啲。」

Steven仲話:「如果下下都係咁講,嗰啲重拍金庸嘅電視劇,咪冇新意囉?咁乜嘢都唔使做喇!」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載