蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年06月17日

【短片】【獨家】胡孟青都俾娛圈千后呃嫌報警嘥時間:我寧願跑番條數返嚟!

建立時間 (HKT): 0617 06:00

騙徒手法層出不窮,但過去4年一名黃姓女騙徒憑藉不斷改名,及稱聲人脈廣、與娛樂圈人熟稔,成功騙取至少10名受害者,包括電影一線影星和娛樂公司高層,粗略估計涉千萬元。受害人之一,包括新城DJ陳達仁,佢話去年年初成立娛樂公司,年中認識女騙徒,訛稱自己識好多圈中人,可以協助佢培訓藝人。陳達仁前後俾咗百幾萬佢,但冇一個project成事,公司亦倒閉。(新聞連結: http://bit.ly/1UXvqjA )

噚晚陳達仁到有線電視大樓錄影《正義同盟》,題目係「娛圈千后」,另一受害人音樂人張佳添因事忙缺席。節目還有胡孟青、歐錦棠及陳珍妮。節目開始之前,眾人送上「你呃人等天收!」嘅生日蛋糕送俾青姐,青姐許生日願望時,大聲道:「呃人嗰班俾天收!」切蛋糕時又好肉緊咁大嗌:「切佢!切佢!」咁激動,因為青姐都係「娛圈千后」受害人。

青姐噚日在其《晴報》專欄文章中已交代受騙始末,而在《正義同盟》節目中就真人發聲重新講一次。青姐話:「早兩日睇報紙先知,俾人呃幾萬蚊好小兒科。我2014年識佢,當時我喺一間餐廳食嘢,對方好主動好熱情咁同我打招,佢都唔係老闆娘,但個姿態就好似老闆娘。佢同我講識邊個天王天后,可以買到演唱會飛啦。嗰時自己都貪方便,覺得又唔係好大數目,可能每次只係買幾張,就托佢買囉。初初兩三次都係托佢幫手買幾張,但係要先俾晒錢嘅,又唔知佢係喺邊度班到啲飛返嚟。

「去到Sammi演唱會,好多身邊朋友都想睇,總共集合咗46張,俾埋錢佢,點知最後佢只係俾到兩張我,其餘44張都冇退番錢,只係話『我會過番戶俾你㗎喇!你俾個戶口我啦!』」當然係收唔到錢。

青姐勞氣地謂:「都冇諗過呢件事會喺自己身上發生。」那可有報警?青姐竟然話……「報警又要錄口供,嗰啲時間,我不如用嚟跑番條數返嚟。三萬幾蚊,有啲人叫我當跌咗就算喇,但我覺得都係辛苦錢,都要好努力賺番嚟,但係最唔開心係,一班朋友冇得睇演唱會之餘,亦令自己好似失信於人咁樣。」

青姐話,佢都係近日睇報道,先至知呢個「娛圈千后」招搖撞騙、周圍同人講識呢個嗰個,再呃其他人:「我喺社會上都有少少名氣,佢可能都會借咁樣再去同人哋講,再去呃其他人。」

「我都算係俾人呃得少,因為我都唔係咁貪小便宜。佢有時會同你講:『我有六隻平啲嘅勞力士,你要唔要呀?賣俾你吖!』有時又有iPad、愛馬士手袋話可以平啲賣俾你,利用呢啲嘢睇下你有冇興趣。佢又話自己係單親家庭,細路好細。咁我覺得你作為母親,更加要以身作則。」

咁如果其他苦主一齊集體報警,青姐可會考慮挺身指證?佢都係嗰句:「若果真係要報警,真係嘥我時間、而又冇乜用嘅話,我寧願都係用呢啲時間跑番條數返嚟喇!」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載