蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年06月21日

【放學唔願返歸】彭羚孖林嘉欣老公齊心「出力」

彭羚、陳秋霞、林志美同袁劍偉等民生舊生,重返母校為校慶出力拍MV。(攝影:沈建程)
建立時間 (HKT): 0621 06:00

彭羚、陳秋霞同林志美今日返到母校民生書院,為90周年校慶拍攝MV《光與生命》,由同樣為校友嘅袁劍偉(林嘉欣老公)執導拍攝。

畢業後只係返過一次母校嘅彭羚,再次重返母校,佢話:「最懷念係個操場,好幸運學校有個咁完善操場,以前放學後我唔願返屋企,會留喺操場睇大哥哥、大姐姐打籃球,而我哥哥係踢足球,之後我加入埋泳隊,學校有個細細哋泳池畀我哋游。」

74年中學畢業嘅陳秋霞指母校運動出色外,音樂亦都好出色,大家可以喺禮堂有演出機會,可能上台膽色就喺呢度練番嚟黎;而林志美除咗參加學校歌唱比賽,仲有朗誦比賽,兼且跟同學組成樂隊,彭羚指當年喺學校已經一早聽到學校出咗呢兩位出名師姐。

今次義務返母校拍攝,佢哋都係二話不說就答應參與,又同樣指自己乜都唔識,只係「得把聲」,所以就負責獻唱。另外成個拍攝隊伍都係校友們邊拍邊學,齊心做好呢件事。問到彭羚係咪有人邀請佢復出開騷?佢話:「我冇聽呢個消息,你聽到話我聽。(係咪都想復出?)暫時唔會啦,剩係幫學校做嘢。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載