› 選擇地區
三藩市
紐約
洛杉磯
其他美國地區
香港 台灣 北美
 
2016年06月26日

【短片】【無懼打壓】王宗堯執導MV七一見街:點解怕敏感?我哋要戰鬥到底

建立時間 (HKT): 0626 06:00

羅斯福說過,我們最需要恐懼,就是恐懼本身。

香港近日發生嘅事,無論係新聞自由遭扼殺、何韻詩因政治因素被取消演出、暗角七警事件,以至銅鑼灣書店事件,港人嘅自由同尊嚴遭嚴重踐踏,令我哋產生無形恐懼。喺呢個水深火熱嘅時候,正如銅鑼灣書店店長林榮基先生所講:「如果我哋唔出聲,香港就冇得救」。所以,我們更應團結起來,更應無畏無懼。

曾製作《選戰》片尾曲《I'llbethere》嘅土生土長音樂人陳詩慧,感覺到時代嘅號召,近日再創作英文歌《We'renotafraid》,激勵港人抵抗強權嘅勇氣同決心。一向敢言發聲嘅「男神」王宗堯,仲自薦為陳詩慧執導MV。新歌於7月1日推出,今日可喺網上率先欣賞teaser。

長約一分半鐘嘅短片,由雨傘革命起始,到獅子山下作結,中間穿插近日發生嘅新聞畫面,包括何韻詩就Lancôme風波接受BBC訪問、曾健超回應暗角七警事件、林榮基講述銅鑼灣書店事件等等⋯⋯香港記者協會主席岑倚蘭、香港《蘋果日報》職工會、香港空中服務員工總會,都企出來協助拍攝。

王宗堯今日接受《蘋果》訪問時話:「我聽咗陳詩慧首新歌,諗番過去兩年,太多不公義,香港人太辛苦,所以我想用自己嘅製作團隊,拍一條屬於香港人嘅MV。」提到當中嘅構思,王宗堯話:「我想帶出好大、好深嘅含義,所以用新聞自由角度去燃點,畀番大家光芒同希望,呢啲係我哋唔可以吝嗇嘅權力。」至於加插新聞片,王宗堯解釋:「過去呢段短短嘅時間發生好多事,尤其近日火災,我睇到香港人係好團結,互相幫忙,可惜去到一啲權力架構,高層面對政策時,我哋會俾人打擊,但信念清晰話畀我哋知,必需要捍衛新聞自由,抗衡強權,必須要保衛屋企,我哋一定要戰鬥到底,唔應該放棄。」

王宗堯去年本來被樂隊Mr.邀請為新歌《不屈》拍MV,但當時有指因為王宗堯嘅政治立場「過敏」而撻Q,今次王宗堯夥拍理念一致嘅陳詩慧一齊出發,當然事半功倍。王宗堯話佢哋製作費有限,僅用咗約五位數字,全程慳住用,無論係航拍定係攞攝影器材,佢都一腳踢。日前宗堯只係帶女助手喺將軍澳《蘋果日報》大樓外取景,王宗堯話:「好感謝堅持信念嘅香港人幫手參與呢個MV,個teaser製作花嘅心機畀MV仲多。」MV鐵定七一推出,王宗堯不擔心敏感:「點解怕敏感?我哋係想表達打不死,無畏無懼精神,連咁都怕咪好驚?」

陳詩慧好滿意MV,佢話:「冇佢(王宗堯)就冇我呢個MV,佢親自執導、拍攝同剪片,全程落手落腳。」陳詩慧難忘佢同王宗堯漏夜去獅子山取景:「當日天氣唔好,夜晚上山嘅經歷好深刻。」陳詩慧呢首係英文歌,冇商業元素,唔係為賺錢出發:「寫歌可以感動到人,已經係好滿足嘅事。我只係純粹想寫一隻宣揚愛,同埋為港人打氣嘅歌。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載