› 選擇地區
三藩市
紐約
洛杉磯
其他美國地區
香港 台灣 北美
 
2016年06月28日

【短片】【藏毒之後】感激Sammi打救衛詩:我o依家乖㗎啦!

建立時間 (HKT): 0628 06:00

09年2月一個晚上,對衛詩(Jill)嚟講,係人生一場浩劫。當晚衛詩同當時緋聞男友關楚耀,喺日本旅行時,涉嫌藏毒被捕,經歷兩個月牢窗生涯,到4月先獲釋。

衛詩上庭當日,記者被派往東京採訪,仲記得當日,容顏憔悴、着上囚衫嘅衛詩喺庭上聲淚俱下,低着頭、直認自己因減壓而吸食海洛英……

今日,坐喺面前嘅衛詩,每講幾句,就會放聲哈哈大笑,面上冇留半點痕跡。衛詩話:「冇過去嘅我,就唔會有依家嘅我!啱啱返嚟香港嗰陣,好徬徨好無助,有日Sammi(鄭秀文)打俾我,話好想送本聖經同埋佢本書俾我,佢家姐嗰時住我屋企樓上,佢就直接上嚟我屋企,話要同我傳福音,仲講咗好多鼓勵我嘅說話!以前嘅我,哈哈,真係睇唔出會返教會,但依家(信仰)對我好重要!」

當年出事時,仲係黎明旗下嘅衛詩,今日同家姐衛蘭,已轉投另一間唱片公司。用咗7年時間淡化過去,但過去種種,依然如影隨形,無可避免成為衛詩今次復出嘅「焦點」!但原來當事人早已學懂放下:「好多人以為我會因為嗰件事從此消失,但神總會為所有人安排佢行嘅路!」

自從藏毒事件後,衛詩同關楚耀從此各行各路。三年前,神為衛詩安排咗一場戀愛,可惜半年前,衛詩同外藉男友,最終分手收場。「散咗啦,係我提出分手先,都係近排嘅事。其實同佢關係淡咗好耐,嗰時我哋拍咗兩年拖,佢已經去咗美國住,習慣冇咗大家嘅生活!一段感情,大家冇咗connection,冇咗火花,開始疑惑,究竟係咪應該繼續。我哋分手嗰陣冇鬧交,好平安咁,睇吓俾少少空間自己,到最後係咪都仲係『你』呢,所以先寫呢隻歌《被滿足的愛》。」

重投幕前,難免要同其他歌手比較,就算親如孖生姊妹,依然難以打破「同行如敵國」定律,家姐衛蘭首新歌《穿花蝴蝶》,放上YouTube三個月,點擊接近80萬。面對呢位既係家姐亦係「敵人」,衛詩繼續哈哈道:「係呀!家姐首歌好多人讚,無所謂啦,各有各做啫!嗰件事之前,我成日同佢鬧交,就算住喺同一間屋,都好少講嘢,喺日本返到嚟,我開始肯聽佢話,乖咗好多。o依家同Janice會坐低傾偈,最近睇咗一段紀錄片,係講動物點變做食物嘅過程,自從嗰日之後,我同Janice決定戒肉!o依家同佢喺屋企,就會鑽研吓有啲咩齋菜可以煮。」

人生同捉棋一樣,舉手不回,匆匆數十載,與其後悔,不如大踏步,放眼向前!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載