蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年07月05日

【笑騎騎放毒蛇】寫歌諷刺社會樂隊After10:政府唔係人民期望

樂隊After10今日喺商台宣傳新歌《大頭佛》。
建立時間 (HKT): 0705 06:00

樂隊After10今日喺商台宣傳新歌《大頭佛》,呢首歌係諷刺現今社會,內容係話好多人表面笑騎騎,背後放毒蛇,每日都有荒謬嘅人同事,阿偉話:「政治圈都有好多呢啲人存在,所以我哋用輕鬆心態寫呢首歌。」阿豐指:「局長搵20幾萬一個月,立法會議員10幾萬一個月,點可以做啲咁荒唐嘅事,真係唔係好合理,連英文訪問都講都好『甩咳』,自己負嘅責任都唔知。」

提到9月立法會選舉,三子表示已經係選民,屆時一定會投票,阿豐話:「以前後生冇咁留意,o依家冇得唔留意,因為已經殺到埋身,所有事都迫在眉睫,好似年幾前嘅雨傘運動,陸陸續續覺得政府唔係人民期望。」阿豐上年做咗爸爸,佢好擔心香港教育局長帶領下做得越來越差,佢仲話:「好多家長話一出世就要搵學前班,但我有朋友喺外國,佢哋話外國唔興,香港所有嘢都係競爭,乜都贏在起跑線,好似宣揚緊歪理,老實講,所有事都同商業掛勾緊,名校唔使錢咩,全部都要收錢,我會覺得官商勾結,營造一個咁樣氣氛而令有啲人有著數,我十分擔心,之前有學生因為功課壓力大而去輕生,令做父母更加擔心,我都同太太傾過,不如10年後移民,又或者讀小學時去一個好地方,呢啲係家長要諗嘅嘢。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載