蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年07月11日

【短片】【魏駿傑走寶!】高登狂推做視后40歲索人妻滕麗名:幻想唔到咁遠嘅嘢

建立時間 (HKT): 0711 06:00

雖然未到農曆七月,但近來大台一套講「鬼」嘅《一屋老友記》離奇地受歡迎,頭五集平均收視25.4點,連高登仔都幫手加持,開po話要推到劇終為止。

《一》劇由「福將」歐陽震華(Bobby)搭胡楓、羅蘭、滕麗名(阿滕)、「長腳蟹」呂慧儀、胡定欣等主演,除咗Bobby之外,高登仔最捧場嘅一定係阿滕!不時見到有人留言讚佢索,甚至有人睇好佢今年可以喺大台頒獎禮上攞獎。

不過,根據大台嘅遊戲規則,「非親生」仔女獲獎機會極低,而阿滕只係簽部頭約,機會係咪等同冇呢?話說阿滕噚日同羅蘭姐去電台做訪問時,話自己同大台嘅部頭約已經完成,亦未傾續約,但佢就放聲氣話約未到期,仲會繼續拍劇,又話恨同Bobby演情侶,令人聯想到阿滕會唔會借續約去換獎。

阿滕噚日接受傳媒訪問時,提到網民力推《一》劇,佢話:「有咁多網民撐已經好滿足,真係好開心,其他嘢唔計喇。」班網民仲撐佢做視后,阿滕表示:「啊,呢啲太遠喇,幻想唔到咁遠嘅嘢。其實TVB好戲嘅人有好多,每個人有唔同嘅際遇,都唔可以話抵唔抵嘅。要珍惜自己擁有嘅嘢,我哋對呢個行業喜愛先可以拍到咁耐,廿年我冇離開過電視,冇呢種熱誠同愛唔會拍到。」

對於網民戥佢唔抵,阿滕會唔會覺得大台對佢唔好?佢就講:「唔可以話TVB對我唔好,始終佢養到我咁大,所有嘢都係佢畀我,我可以喺大陸拍劇都係因為《陀槍師姐》,凡事都有好多面。」

此外,唔少高登仔重提阿滕同舊愛魏駿傑9年情,寸魏駿傑「走寶」,二人忽然喺2007年爆出分手,滕麗名左手手臂、手腕及頸部,更無故出現傷痕,令人懷疑是受情傷所致,不過滕麗名依然維護魏駿傑,堅稱分手絕無第三者出現,後嚟網民仲封佢係「不識時務者魏駿傑」。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載