蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年07月11日

【短片】【滕麗名十大經典你要知】扮過男仔頭外貌激似AV女優

建立時間 (HKT): 0711 06:00

40歲嘅滕麗名出道21年,大家熟悉嘅滕麗名係電視劇演員,其實佢入行係靠唱歌,除此之外佢仲拍過戲,近年女人味越嚟越濃,仲畀網民話佢知樣同AV女優好似o添!

1.參加過新秀
滕麗名參加1995年新秀入行,同年參賽者仲有陳奕迅、楊千嬅等,滕麗名仲打入最後8強,不過最後擠身唔到入5強,所以冇得同唱片公司簽約。

2.入讀藝訓班
失落新秀,滕麗名就以旁聽生入讀1995年嘅第八期藝訓班加入大台,同年嘅旁聽生仲有湯盈盈、姚瑩瑩等。

3.唱過《咕嚕咕嚕魔法陣》兒歌
雖然滕麗名做唔到歌手,不過大台似乎好賞識佢嘅歌喉,仲唱過唔少兒歌,代表作就一定係《咕嚕咕嚕魔法陣》首歌《魔法咕嚕咕嚕》,唔少80後都表示耳熟能詳!

4.拍戲扮TB
1997年入行冇耐嘅滕麗名有份參演《四個32A和一個香蕉少年》,戲中佢仲剪短髮扮TBo添!

5.陀槍師姐陳三元
滕麗名最廣為人知嘅成名作就係《陀槍師姐》系列嘅電視劇,1998年拍攝第一輯《陀槍師姐》滕麗名仲同劇中對手魏俊傑撻着,不過拍拖九年最後都係分手收場。

6.錯愛人夫郭政鴻
07年,滕麗名被指同郭政鴻拍《野蠻奶奶大戰戈師奶》擦出愛火,仲發展咗近兩年地下情,不過男方被指同滕麗名拍拖時,原來已經有家屋兼小朋友,最後滕麗名同郭政鴻嘅戀情告終。

7.無bra凸點成熱話
滕麗名喺年嘅《桌球天王》中飾演錢滔滔一角,劇中不時以行政人員look現身嘅滕麗名被網民cap圖,指佢其中一幕似「無bra凸點」即刻成為網上熱話。

8.「豬扒」造型抄俏Betty
2010年拍攝《女人最痛》中嘅「豬扒」造型,被指嚴重抄美劇《俏Betty》嘅造型。

9.勁似AV女優
滕麗名一向都被視為禾稈冚珍珠嘅女星之一,仲有唔少網民話佢勁似AV女優希志愛野同埋椎名由奈。

10.最叻拎過豬肉獎
講番事業,滕麗名入行21年喺大台做足咁耐,佢提名過9次視后、4次配角,不過都係得個桔,最叻就係04年喺《Astro華麗台電視劇大獎》拎咗「我的至愛角色」,希望呢個豬肉獎唔會係佢唯一一個獎啦!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載