› 選擇地區
三藩市
紐約
洛杉磯
其他美國地區
香港 台灣 北美
 
2016年07月16日

【前男友狂追十優港姐】懶理舊愛是非糖妹:不如講吓我近況

攝影:黃曉妍
建立時間 (HKT): 0716 06:00

糖妹同周國賢今日喺上環出席「FuzeTea電車之旅」,佢哋會喺電車上進行音樂演出,對於搭電車嘅回憶,周國賢話:「我成日都搭,因為太方便,最鍾意去到上層乜都唔使理,不過要坐成粒鐘。」係咪好有MVfeel?佢笑住指當年《目黑》就係喺電車拍。

糖妹表示會帶外地朋友搭電車,等佢哋感受一下香港人嘅集體回憶,知道香港仲有一個好古老嘅交通工具仲郁緊。周國賢話:「對我哋嚟講可能係習以為常,但佢哋連雙層巴士都冇,佢哋會覺得雙層巴士已經好吸引,但仲要係電車,有路軌,橫巷又有燈光街招,對佢哋嚟講,睇開香港電影就好似我哋睇荷里活電影。」

提到現時有冷氣電車,周國賢認為:「雖然有冷氣梗係好,但我自己始終覺得電車冇冷氣,咁開通開揚先有嗰種懷舊嘅味道。」佢哋仲話如果有機會,都想試下喺電車開個迷你音樂會,但周國賢笑住話:「呢個好似有啲拉票feel。」糖妹即刻話:「最緊要個咪夠大聲。」

提到「鴨王」何浩文近日被傳同林作爭「十優港姐」麥明詩外,早前又被爆以短訊狂媾34C女DJ安采妮(前名馮殷),雖然何浩文寸爆有人借佢上位,身為何浩文舊愛嘅糖妹事前已透過公關表明唔會回應任何緋聞,到提問時,佢依然封嘴拒作回應,仲即刻轉話題話:「講吓我近況,早排上海東方衛視有個節目叫我扮陳慧嫻姐姐,本來有機會同台合唱,不過我有工作撞咗期。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載