› 選擇地區
三藩市
紐約
洛杉磯
其他美國地區
香港 台灣 北美
 
2016年07月21日

【恐襲陰霾下...】偉仔將去歐洲拍戲 劉嘉玲:冇得驚要發生就發生

今日係嘉玲同偉仔結婚8周年紀念,但佢哋都有嘢做,已經預先慶祝。(攝影:陳順禎)
建立時間 (HKT): 0721 06:00

劉嘉玲今日去中環出席《光‧影‧香港夜傳媒簡介會》,佢被委任為「光‧影大使」,講到呢個展覽會介紹好多香港文化嘅歷史,嘉玲話o依家好多後生仔女都未必知道香港嘅本土文化,自己就好鍾意一啲古舊嘅建築物,中西文化合壁,嘉玲仲話自己真係好鍾意香港,亦慶幸自己八十年代移民嚟咗香港,覺得香港好吸引。

講到之前佢喺大陸拍攝真人騷,嘉玲話覺得幾好玩,但如果可以多一日半日就好嘞,因為節目節目介紹好多中國文化,分別去過澳門塔跑,輸咗就要玩笨豬跳,又試咗唱「昆劇」。

原來今日係佢同偉仔嘅結婚8周年,嘉玲聽到記者提起,即刻笑晒咁話:「吖!你哋(記者)仲記得佢嘅結婚日子,不過今日我同偉仔都要工作,今晚我要出席政務司長晚宴,我哋之前已經慶祝咗,大家都係交換吓禮物,食吓飯咁囉!」問嘉玲收咗乜嘢禮物?佢話:「嘩!神秘嘢,好神秘嘅!」咁問番佢送乜俾偉仔?佢就答:「好勁㗎呢樣嘢,唔係普通嘢,好vintage嘅嘢,係有意思嘅,份禮物就好似講緊我同佢嘅故事咁!」

另提到偉仔將拍攝電影《歐洲攻略》,歐洲接連發生多宗懷疑恐怖襲擊,問到擔唔擔心偉仔去歐洲拍戲會好危險?嘉玲話:「冇得驚嘅,台灣巴士都有爆炸啦,要發生嘅嘢就發生,自然災害好難避免,周不時發生,唔係預期之內嘅事囉!所以任何嘢都要珍惜!」問到可要偉仔每日一電報平安?佢話:「佢比較擔心我多啲,因為我會周圍去,佢平時拍戲一係喺片場,一係喺酒店,我就可能會去飲嘢!」嘉玲就話今次唔會去歐洲探班,因為佢都有自己嘅工作。

提到趙世光噚日病逝,嘉玲話本身唔認識對方,但覺得對方係香港代表人物。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載