蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年07月28日

【短片】【兩年前港姐冠軍係邊位?】「民間港姐」吳凱欣大台發呆兩年終於甩身!

建立時間 (HKT): 0728 06:00

2014年選港姐大熱倒灶,但深得觀眾同網民喜愛,被封為「民間港姐」嘅吳凱欣,當年導演舒琪都喺facebook恭喜佢輸咗:「落選了,可能還可以把人保住,免於墮落...她是一個有潛質的演員,我很希望我下一次看見她,是在正式的銀幕上,在一部worthwhile的電影裡。」去年12月,吳凱欣真係離開咗大台,終於行自己選擇嘅路。

喺大台呆咗兩年嘅吳凱欣,去年12月終於回復自由身,佢接受電話訪問表示:「其實選港姐後有15個月任期做慈善活動,之後我諗過,都係希望去拍電影,仲想學習多啲,所以冇選擇簽長約,去咗紐約讀書進修,直到舊年12月港姐合約先完。」

吳凱欣坦言呢段時間,大台都有搵番佢做慈善活動:「呢啲都係港姐要履行嘅責任,之後其實我自己選擇離開香港去讀書,o依家得閒會同TVB合作,之前拍咗鄭俊弘MV,所以大家關係都唔錯。其實自己都因為選港姐多咗人識,呢段時間我唔係心急嘅人,鍾意慢慢學嘢同摸索,所以o依家乜嘢都試,試吓做演員同主持,有時可能喺電視台會被動少少,o依家我可以去選擇自己嘅路。」

離開大台後,吳凱欣今年初就拍咗電影《神行太保》,男主角係古天樂,佢話:「好幸運可以做女主角江一燕年輕版,發覺自己最想最鍾意做電影演員,希望可以演更多嘅電影。」雖然喺大台呆等兩年冇機會,但有麝自然香嘅吳凱欣,最近又接咗一部新戲《戀@廣場》,終於等到有機會做女主角,呢部戲由陳哲民導演,邱禮濤監製。

除咗拍戲之外,呢半年佢主力為港台拍環保節目《天人合一》,去過法國、德國、奧地利、瑞典同丹麥等地方:「第一次做主持好興奮,因為可以去好多地方,但最重要可以落手落腳,幫公公婆婆小朋友做垃圾分類,帶返環保資訊俾香港人,自己做artist其實最想係做啲嘢,可以影響到其他人,所以呢個節目對我嚟講係好有意義嘅事。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載