蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年07月28日
馬上成為壹會員

【短片】【「好似大媽與傻仔」】鄧達智嚴評中國奧運隊「蕃茄炒蛋」:唔醜唔揀!

建立時間 (HKT): 0728 06:00

巴西里約奧運下個月頭殺到,本地時裝設計師鄧達智(William)噚晚就喺fb放咗個Post關於唔同國家隊嘅制服見解,中國隊一向都係紅同黃為主色,屆屆都被人笑佢哋似「蕃茄炒蛋」,William都唔例外有同一感覺,佢仲留言:「平心而論,中國隊這次選擇的制服,真的好攞命!」,仲貼上3個尖叫emoji。

隔咗一陣,William再tag返佢呢個Post仲留言:「奇怪,從來未曾發生過,Post突然消失,不是被禁聲吧?」還post了其他國家隊好似巴西、加拿大、美國、英國隊制服,叫大家客觀點評評,自己亦同再留句:「蕃茄炒蛋,中國人至愛!」唔通說話唔啱聽,方丈小器了?

當中就有兩個設計師朋友中肯留言。
文麗賢:「人家是有能者當之,強國人要配合國情,是有關係者、會走後門者當之。人哋要用紅色,你又做好色,不明為何總是要挑最醜的紅,仲要加上黃色,真的醜到要叫。」
HenryLau亦留言:「完全Match國家形像和Character同品味!!perfectdesign」,再加5個尖叫emoji。

《蘋果》就搵過William,佢就表示:「噚晚12點post,當中有唔同國家隊相,啲朋友都有留言,隔咗一陣,就只係得返我留言嗰幾句,之前留嘅內容冇晒。玩咁耐facebook冇試過,如果我撳錯嘢,我係見到。」

問到會唔會內容敏感被「河蟹」,William就話:「照計冇,好跪異,中國都選擇咗呢樣嘢,都預咗唔會全世界贏晒,中國咁大,唔會有呢啲嘢睇唔開啩?唔會為呢啲嘢小器啩?但真係唔見咗又解釋唔到,所以有一刻會懷疑自己被噤聲。」

「古巴咁窮,理得佢邊個設計,中國都有好多好勁設計師,唔係設計師問題,係揀出嚟、邊個拍板嘅問題。衫就一套,冇一個國家有高難度設計,係拍板嗰個人有冇見識,揀行出嚟有國體,要心服口服係靚,但嗰套衫(中國代表隊)真係醜樣到震,輯相揀啲人又騎呢,好似大媽與傻仔,人哋全世界揀嗰啲,係國家形象,有啲游水個啲又靚又型,就算啲人唔buy套衫,都會睇得靚。」

對於中國隊嘅「蕃茄炒蛋」裝多年被彈,有指係紅色同黃色國旗色有限制,William就稱:「JudyMann話中國揀隻最醜紅色,我認同係唔醜唔揀,不過明白人哋係要跟番國旗隻色,唔可以有偏差,不過就算跟國旗隻色都好,都可以做得好啲,白色短裙似OL,人哋三角骨Bermuda短褲幾好睇,好靚。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載