蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年08月23日

【有冇名都唔緊要】唔介意做特約演員 煒烈:最緊要有戲做

15,608
煒烈話唔介意有冇名,最緊要有戲做!
最後更新: 0823 22:08 / 建立時間 (HKT): 0823 18:43

曾經喺亞視劇《我和殭屍有個約會》第一輯裡面飾演「御命十三」嘅煒烈,最近喺大台啲劇竟然見番佢嘅踪影,噚晚仲喺網上成為網民嘅談論對象。

相關新聞:【享受拍劇生活】做特約為興趣 煒烈:依家嘅心境係無慾無求

事緣喺噚晚嗰集《城寨英雄》,有一場戲話煒烈帶咗啲師傅去咗伍允龍間拳館切磋武術,雖然只係短短嘅幾分鐘戲,但係網台「有台channel D毒舌式劇評節目——N分鐘劇毒」嘅主持人「620」發現喺片尾嘅演員表裡面,完全冇煒烈個名,所以大家覺得有啲唔尊重前輩。今日煒烈接受傳媒訪問,講番呢件事,佢好開心咁話:「真係好多謝,好多謝,今日我有好多朋友打電話嚟,問我點解返番入去,連名都冇,因為我依家係特約演員,所以有時會有名,有時會冇名。」

煒烈仲話:「我哋都幾廿歲,捱咗幾廿年,仲爭呢啲做乜鬼?依家做人做事至在為興趣,有冇名都冇所謂,最緊要有戲做。」查實佢喺2015年返咗無綫,已經拍咗好多套劇,不過一直佢都以特約身份去拍,問佢點解唔約做藝人,佢話:「當初佢哋問我有冇時間返去玩吓,我見有時間,咪返去玩吓。以前拍戲一個禮拜瞓唔到8個鐘頭,但係依家年紀大咗唔係咁捱得,如果拍古裝,天氣熱又驚自己捱唔到,到時唔知點樣推咪仲煩, 所以好似依家咁,玩吓玩吓咁,啱做就,唔啱就唔係,假如簽咗約就冇得推。」

相關新聞:【特約演員都係演員】「御命十三」煒烈拍《城寨英雄》 演員表連名都冇

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載