蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年08月27日
馬上成為壹會員

【激讚Supper Moment有大將之風】險被大會調走 神奇膠主音日新:感恩Sunny表態幫忙

建立時間 (HKT): 0827 15:23

噚晚有份喺中環海濱滑水嘉年華「Slide The City」個本地Band Sound騷嘅樂隊神奇膠,喺facebook表示被大會Cut歌、開咪催setting同調rundown,極不尊重本地樂隊。

相關新聞:【出事!】神奇膠感謝Supper Moment當紅不讓:Slide The City X你老X

神奇膠主音日新接受《蘋果》查詢時,再次講番件事:「我哋結他手同Supper Moment講起係咪要調rundown,大家都覺得好奇怪,好彩Sunny就好有大將之風,亦識咗好多年,好感恩佢嘅幫忙同表態,佢問我哋:『想喺我哋前面出定後面出,你哋會舒服啲?』」日新就話當然喺佢哋之前出好啲,因為佢覺得如果佢喺Supper Moment後面出,一來冇乜時間,二來啲人都會走,Sunny拍心口就話:『好,咁我拒絕佢哋嘅安排。』喺附近工作人員就聽到神奇膠同Sunny嘅對話,就同日新講:「得,咁你哋o依家上台啦,setting最緊要簡單同埋要快!」

日新表示作為樂隊,遇到咁嘅情況心情當然會失落,仲話有朋友覺得,如果安排Supper Moment上台先,如果時間真係唔夠,可能會cut咗神奇膠嘅演出,但佢好感謝Sunny嘅幫忙,冇令呢件事發生。仲有一樣嘢令佢好唔開心,日新話:「我哋上到台後,都知道成個setting要好快,都要配合SM,所以我哋都鼓手都同SM嘅鼓手阿達溝通咗,我哋成套鼓嘅setting係用阿達嘅setting,方便佢哋一上台就唔需要再set過。而琴方面,我哋都揀咗兩首少啲用琴嘅歌,都要想慳時間,成個過程都只係用咗3,4分鐘,但大會用咪同我哋講:『快啲開始啦,套鼓都set好啦,快啲開始啦。』但套鼓係未set好嘅,呢樣嘢令我哋好難受,我哋表演咗咁多年,都未試過畀人用咪催我哋,我哋唔係set咗10分鐘,只係set咗一分鐘。」

相關新聞: 【被大會開咪催】神奇膠強調唔介意Cut歌 主音日新:自己嘅地位原來咁低

「其實我哋咁嬲,因為我哋覺得呢個主辦單位,根本冇重視一隊獨立樂隊,我哋知道之後會有好多獨立樂隊去玩,我哋希望除咗會對我哋有一個道歉之外,雖然我覺得佢唔會理我哋,但唔緊要,最主要係大家,即係搞手,對樂隊有一個尊重,有一個基本嘅禮貌,唔好當我哋係佢哋嘅下屬,真係咁多年演出,未試過有一個咁嘅經驗,真係好難受。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載