蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年10月06日

【《壹號皇庭》女星搖籃】 宣萱陳慧珊榮升花旦 Sammi王菲雄霸樂壇

67,783
最後更新: 1006 17:20 / 建立時間 (HKT): 1006 00:02

今年46歲嘅宣萱,91年拍廣告後加盟無綫,95年佢接拍鄧特希嘅《壹號皇庭IV》後,就奠定咗佢做女主角嘅地位。其實鄧特希嘅《壹號皇庭》系列,都捧紅咗唔少女星。

相關新聞:【宣萱...真可愛...宣萱】路人亂入求助 宣萱照樣教路 勁nice!

陳慧珊
46歲嘅陳慧珊,94年加入無綫喺明珠台擔任新聞節目及天氣節目主持,96年拍攝首部電視劇《壹號皇庭V》而走紅,其後與蔡少芬、郭可盈、宣萱被封為「四大花旦」。12年,與老公鍾家鴻及女兒到美國生活而暫時息影,13年復出拍攝《女人俱樂部》。

蔡少芬
43歲嘅蔡少芬,奪得91年香港小姐季軍後加入無綫,第一套劇《風之刀》就同梁小冰、袁潔瑩一齊做女主角,98年就憑《天地豪情》勇奪《萬千星輝頒獎典禮》最佳女主角,Ada當年奪獎時只有25歲,成為最年輕嘅視后,至今仍然未有人打破到呢個紀錄。最近宣佈回巢拍攝大台劇集《老表3》。

相關新聞:【與羅嘉良傳緋聞】宣萱曾戀中信泰富主席堂姪 拍拖6年分手

鄭秀文
44歲嘅Sammi,佢喺《壹號皇庭》嘅始祖,第一輯入面就做見習大律師Josephine,之後就專注番佢唱歌,成為90年代嘅天后,最近Sammi仲抱病舉行八場演唱會,令到很多歌迷激讚。

王菲
47歲嘅王菲,佢喺第二輯嘅《壹號皇庭》做檢察官Mandy,當時阿菲仲叫緊王靖雯,之後佢就冇乜拍劇喇,咁佢o依家貴為天后,今年12月,佢就喺上海開「幻樂一場」演唱會。最貴嘅係7800人民幣,最平嘅就係1800人民幣。

陳秀雯
54歲嘅陳秀雯,《壹號皇庭》第一輯就見到佢同歐陽震華嘅鬼馬演出,95年離開大台,到亞視拍劇,同轉戰大陸,其間佢有段時間處於半退穩狀態,11年承認同林國雄離婚後,就全面復出,今年7月就為恩師盧國沾嘅演唱會任嘉賓,12月就同廖啟智合演舞台劇《折翼天使》。

劉美娟
48歲嘅劉美娟,《壹號皇庭》入面佢同陶大宇做兩兄妹江承宇同江承宙,做足三輯,之後佢就離開無綫。近年佢就喺數碼電台dbc做主持,今年9月,dbc結業,劉美娟就加入咗失業大軍。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載